Në ditën e gjashtë të protestave në Tiranë, situata është përshkallëzuar në përplasje të dhunshme mes protestuesve dhe Policisë. Protestuesit janë mbledhur para Ministrisë së Arsimit, ndërsa më pas kanë sulmuar me gurë selinë e Partisë Socialiste dhe disa institucione të tjera. Policia është kundërpërgjigjur me gaz lotsjellës dhe autobotë uji, ndërsa tensionet janë përhapur në disa zona të kryeqytetit.
Situata është rënduar më tej në sheshin “Skënderbej”, ku janë hedhur molotovë në drejtim të efektivëve, ndërsa raportohet se një polici i është përfshirë uniforma nga flakët. Më vonë, zjarri ka përfshirë disa ambiente të Komisariatit nr. 3, ku raportohet se janë lënduar disa efektivë. Gjatë përplasjeve janë lënduar edhe persona të tjerë, ndërsa Ministria e Shëndetësisë bëri me dije se në protestën e së shtunës mbetën të lënduar 65 persona, mes tyre 37 punonjës policie.
Kryeministri Edi Rama deklaroi se shteti nuk do të tërhiqet përballë dhunës, ndërsa u bëri thirrje studentëve që kërkojnë dialog të takohen me të. Komisioni Evropian dënoi aktet e dhunës, duke theksuar se reagimi i autoriteteve duhet të jetë në përputhje me ligjin dhe proporcional, ndërsa raportuesi i Parlamentit Evropian për Shqipërinë, Andreas Schieder, kërkoi ndalimin e menjëhershëm të përshkallëzimit. Ndërkohë, është anuluar vizita zyrtare e Ramës në Vjenë, e planifikuar për të hënën, më 19 tetor.
