Shtetasit e Kosovës me banimim në Austri do ta kenë më të lehtë procedurën e konvertimit të patentës, pas ndryshimeve që kanë hyrë në fuqi më 1 shtator 2026.
Austria i njeh patentat e Kosovës për të gjitha kategoritë për qëllimin e konvertimit në patentë austriake dhe gjatë kësaj procedure nuk kërkohet provim praktik i vozitjes. Kjo njohje nuk është risi e shtatorit, pasi për patentat e Kosovës zbatohet që nga 1 marsi 2025.
Ndryshimi i ri lidhet me rastet kur autoritetet austriake e marrin patentën origjinale për kontroll teknik ose kriminalistik, me qëllim verifikimin e autenticitetit të saj. Nga 1 shtatori, personit në këtë situatë duhet t’i lëshohet një vërtetim i përkohshëm zyrtar, me të cilin mund të vazhdojë të vozisë në Austri edhe gjatë kohës kur patenta origjinale ndodhet te autoritetet për verifikim.
Në dokumentin e përkohshëm shënohen kategoritë e patentës që personi posedon. Ai vlen deri në lëshimin e patentës austriake, por jo më gjatë se gjashtë muaj nga dita kur personi ka vendosur banimin e zakonshëm në Austri.
Nëse gjatë kontrollit rezulton se patenta nuk i plotëson kushtet për konvertim, vërtetimi i përkohshëm e humb vlefshmërinë.
Në përgjithësi, një person që vendos banimin në Austri mund ta përdorë patentën e Kosovës për gjashtë muaj. Pas kësaj periudhe, për të vazhduar vozitjen, duhet ta konvertojë atë në patentë austriake.
Për shembull, nëse një shtetas i Kosovës vendos banimin në Austri më 1 tetor 2026 dhe gjatë procedurës autoritetet ia marrin patentën për verifikim, ai mund të marrë vërtetimin e përkohshëm dhe të vazhdojë të vozisë. Megjithatë, kjo e drejtë nuk mund të zgjasë përtej 1 prillit 2027.
Ndryshimet e reja prekin edhe kategoritë profesionale C, C1, CE, C1E, D, D1, DE dhe D1E. Pas moshës 60-vjeçare, vlefshmëria e tyre bëhet pesë vjet, në vend të dy viteve. Për vazhdimin e këtyre kategorive vazhdon të kërkohet raport mjekësor për aftësinë për vozitje.
Patentat profesionale të lëshuara para 1 shtatorit 2026 me afat dyvjeçar nuk zgjaten automatikisht. Afati i ri pesëvjeçar zbatohet gjatë vazhdimit të ardhshëm.
Një tjetër ndryshim lidhet me patentën ndërkombëtare të lëshuar sipas Konventës së Vjenës, e cila nga 1 shtatori mund të vlejë deri në tre vjet, në vend të një viti. Ky ndryshim është i ndarë nga procedura e konvertimit të patentës së Kosovës. /Urgjent.com/
