Prindërit në Zvicër do të përfitojnë një formë të re mbështetjeje financiare për kujdesin institucional të fëmijëve, pas miratimit të një ligji të ri kombëtar që synon të ulë barrën ekonomike të familjeve dhe të lehtësojë pjesëmarrjen e prindërve në tregun e punës dhe në arsim.
Pas vitesh diskutimesh dhe negociatash, autoritetet zvicerane kanë miratuar ligjin që parashikon subvencione mujore për familjet që i dërgojnë fëmijët në çerdhe të licencuara ose i lënë në përkujdesje të familjeve kujdestare të autorizuara.
Deri në 500 franga për çdo fëmijë
Sipas skemës së re, prindërit do të mund të përfitojnë nga 100 deri në 500 franga zvicerane në muaj për secilin fëmijë, në varësi të numrit të ditëve që ai kalon në kujdes institucional.
Për fëmijët me aftësi të kufizuara, subvencioni mund të jetë edhe më i lartë, në rastet kur kujdesi i tyre kërkon shpenzime shtesë.
Kush mund të përfitojë?
Ligji përcakton se të drejtën për këtë mbështetje financiare do ta kenë prindërit që:
janë të punësuar;
ndjekin studime universitare;
janë në trajnim profesional ose arsimim.
Një nga kushtet kryesore është që fëmija të ndjekë një çerdhe të licencuar ose të kujdeset nga një familje kujdestare e autorizuar në territorin e Zvicrës.
Ndërkohë, kujdesi që ofrohet nga gjyshërit ose familjarë të tjerë nuk do të subvencionohet përmes kësaj skeme.
Përveç kësaj, familjet duhet të plotësojnë edhe kritere të tjera, përfshirë nivelin minimal të të ardhurave, ndërsa fëmija duhet të ketë vendbanim të rregullt në Zvicër.
Rreth 600 milionë franga në vit
Sipas autoriteteve zvicerane, zbatimi i kësaj skeme do t’i kushtojë shtetit rreth 600 milionë franga zvicerane në vit.
Financimi do të organizohet nga kantonet, ndërsa pagesat do të realizohen përmes fondeve të kompensimit familjar.
Kur do të fillojnë pagesat?
Megjithëse ligji është miratuar, subvencionet nuk do të shpërndahen menjëherë.
Fillimisht duhet të hartohen aktet nënligjore dhe kantonet të harmonizojnë legjislacionin e tyre me dispozitat e reja.
Për këtë arsye, autoritetet zvicerane parashikojnë që pagesat e para të nisin në fund të vitit 2029 ose në fillim të vitit 2030.
Ligji konsiderohet një nga reformat më të rëndësishme në politikën sociale të Zvicrës, pasi synon të ulë kostot e kujdesit për fëmijët, të mbështesë familjet dhe të krijojë kushte më të favorshme që prindërit të vazhdojnë punën ose arsimimin pa u përballur me barrë të lartë financiare.
