Kosova ka shpenzuar 128,019,585.98 euro për importin e energjisë elektrike vetëm gjatë gjashtë muajve të parë të vitit 2026, ndërsa në të njëjtën periudhë qytetarët janë përballur me reduktime dhe ndërprerje të herëpashershme të furnizimit me energji.
Të dhënat zyrtare të Doganës së Kosovës, të analizuara nga Gazeta Infokus, tregojnë se nga janari deri në fund të qershorit 2026 në vend janë importuar 1,193,288.04 megavat-orë (MWh) energji elektrike, sipas regjistrave të importit për kodin tarifor 2716000000.
Shifrat dëshmojnë se edhe pse janë shpenzuar mbi 128 milionë euro për sigurimin e energjisë nga jashtë, sistemi energjetik i vendit ka vazhduar të përballet me vështirësi në furnizim, duke sjellë kufizime dhe reduktime në disa zona të Kosovës.
Janari, muaji me faturën më të lartë
Muaji janar rezulton të ketë qenë periudha më e kushtueshme për importin e energjisë elektrike.
Gjatë këtij muaji Kosova importoi 293,207.09 MWh, duke paguar gjithsej 35,806,685.09 euro.
Furnizuesi kryesor ishte Shqipëria, nga e cila u importuan 173,880.09 MWh, me vlerë 20,275,436.26 euro, ndërsa Maqedonia e Veriut ishte furnizuesi i dytë më i madh.
Shkurti mbi 21 milionë euro
Edhe në muajin shkurt importi mbeti në nivele të larta.
Kosova importoi 166,070 MWh, me një kosto totale prej 21,081,077.18 euro.
Gjatë këtij muaji, Maqedonia e Veriut ishte ndër furnizuesit kryesorë me 82,806 MWh, në vlerë prej 11,152,028.30 euro, ndërsa pjesë e konsiderueshme e energjisë u sigurua edhe nga Shqipëria.
Mbi 16.6 milionë euro në mars
Në muajin mars u importuan 184,615.85 MWh energji elektrike, me një kosto prej 16,689,268.33 euro.
Edhe këtë muaj importi u dominua nga Shqipëria, me 123,089.85 MWh, në vlerë 10,307,922.47 euro, ndërsa Maqedonia e Veriut renditej si furnizuesi i dytë.
Prilli me afro 17 milionë euro import
Gjatë muajit prill, Kosova importoi 150,130.77 MWh energji elektrike, duke shpenzuar 16,866,538.25 euro.
Sërish, Shqipëria ishte furnizuesi kryesor me 71,020.77 MWh, në vlerë prej 8,137,216.03 euro, ndërsa pjesa tjetër u sigurua kryesisht nga Maqedonia e Veriut.
Mbi 15.7 milionë euro në maj
Pavarësisht hyrjes në sezonin pranveror dhe rritjes së temperaturave, nevoja për import nuk u ul ndjeshëm.
Në muajin maj u importuan 162,362.92 MWh, me një kosto prej 15,710,488.98 euro.
Këtë herë furnizuesi kryesor ishte Maqedonia e Veriut, me 77,305 MWh, në vlerë prej 7,359,414.69 euro, ndërsa Shqipëria renditej e dyta me 69,139.92 MWh, në vlerë prej 6,636,480.63 euro.
Qershori solli sërish mbi 21 milionë euro shpenzime
Edhe në muajin qershor, kur zakonisht konsumi i energjisë është më i ulët krahasuar me dimrin, importi mbeti shumë i lartë.
Kosova importoi 236,901.41 MWh, duke paguar 21,865,528.15 euro.
Edhe këtë muaj, Shqipëria ishte furnizuesi kryesor me 112,610.41 MWh, në vlerë prej 10,043,298.24 euro, ndërsa Maqedonia e Veriut renditej e dyta.
Mbi 1.19 milionë MWh dhe 128 milionë euro në gjashtë muaj
Në total, gjatë periudhës janar–qershor 2026, Kosova:
importoi 1,193,288.04 MWh energji elektrike;
shpenzoi 128,019,585.98 euro për importin e saj.
Këto shifra e bëjnë gjysmën e parë të vitit 2026 një nga periudhat me shpenzimet më të larta për import të energjisë elektrike.
Energji u importua edhe nga Serbia
Përveç importeve nga Shqipëria dhe Maqedonia e Veriut, të dhënat tregojnë se Kosova ka importuar energji elektrike edhe nga Serbia gjatë vitit 2026.
Megjithëse sasitë janë dukshëm më të vogla, importi nga Serbia është regjistruar në tre muaj të ndryshëm të gjysmës së parë të vitit.
Sipas të dhënave:
Shkurt: 440 MWh – 50,260.39 euro;
Mars: 240 MWh – 29,952 euro;
Qershor: 140 MWh – 11,480 euro.
Në total, nga Serbia janë importuar 820 MWh energji elektrike, me një vlerë prej 91,692.39 euro.
Shifrat pasqyrojnë varësinë e vazhdueshme të Kosovës nga importi i energjisë elektrike, pavarësisht kostove të larta financiare dhe sfidave të vazhdueshme në furnizimin e konsumatorëve me energji gjatë muajve të parë të vitit.
