Një ngjarje e rëndë kriminale ka tronditur qytetin e Dortmundit në Gjermani, ku një mjek i njohur është gjetur i pajetë në banesën e tij, ndërsa për vrasjen dyshohet djali i tij 41-vjeçar.
Sipas raportimeve të gazetës gjermane Bild, viktima është Harald N., një pediatër i respektuar në Dortmund, i njohur për angazhimin e tij shumëvjeçar në kujdesin ndaj fëmijëve dhe mbështetjen e familjeve të tyre.
Ngjarja mori një kthesë dramatike pasi djali 41-vjeçar u paraqit vetë në Polici, ku, sipas raportimeve, deklaroi se kishte privuar nga jeta të atin. Pas deklarimit të tij, autoritetet nisën menjëherë hetimet dhe shkuan në banesën e viktimës, ku gjetën trupin e pajetë të mjekut.
Policia dhe Prokuroria kanë nisur një hetim të gjerë për të zbardhur motivin dhe rrethanat në të cilat ndodhi krimi, ndërsa hetuesit po mbledhin prova dhe po marrin në pyetje personat që mund të kenë dijeni për rastin.
Trupi i viktimës do t’i nënshtrohet autopsisë, e cila pritet të përcaktojë shkakun e saktë të vdekjes dhe të ndihmojë në sqarimin e rrethanave të ngjarjes.
Po ashtu, Prokuroria pritet të vendosë nëse do të kërkojë caktimin e masës së paraburgimit ndaj 41-vjeçarit, i cili dyshohet për këtë vepër penale. Hetimet janë ende në zhvillim dhe autoritetet nuk kanë bërë publike detaje të tjera lidhur me motivin e dyshuar.
Harald N. jetonte i vetëm në shtëpinë e tij prej disa vitesh, pasi bashkëshortja e tij kishte ndërruar jetë në vitin 2019. Ai gëzonte respekt të madh në komunitetin mjekësor dhe ishte vlerësuar për përkushtimin e tij profesional, veçanërisht për mbështetjen që u jepte prindërve të fëmijëve të prekur nga kanceri.
Hetimet për këtë rast po vazhdojnë, ndërsa autoritetet gjermane pritet të publikojnë më shumë informacione pas përfundimit të ekzaminimeve mjeko-ligjore dhe procedurave hetimore.
