Sot është dita e fundit për regjistrimin e diasporës për të votuar në zgjedhjet e 7 qershorit, ndërsa interesimi i qytetarëve që jetojnë jashtë Kosovës ka thyer çdo rekord të deritanishëm.
Sipas raportimeve dhe të dhënave të publikuara gjatë ditëve të fundit, mbi 117 mijë qytetarë janë regjistruar për të marrë pjesë në procesin zgjedhor, duke shënuar një mobilizim të jashtëzakonshëm të mërgatës shqiptare.
Interesimi i madh i diasporës po konsiderohet si një nga momentet më të rëndësishme të këtyre zgjedhjeve, ndërsa analistë të shumtë politikë po vlerësojnë se vota e mërgatës mund të ketë ndikim të madh në rezultatin përfundimtar.
Në anën tjetër, sondazhet e fundit vazhdojnë ta nxjerrin të parën Lëvizja Vetëvendosje, e cila sipas matjeve të publikuara së fundmi po ruan epërsinë ndaj partive tjera politike para zgjedhjeve të 7 qershorit.
Komisioni Qendror i Zgjedhjeve u ka bërë thirrje të gjithë qytetarëve që ende nuk janë regjistruar, ta shfrytëzojnë ditën e fundit për të përfunduar aplikimin dhe për t’u bërë pjesë e procesit zgjedhor.
