Interesimi i diasporës për pjesëmarrje në zgjedhjet e 7 qershorit po shënon rritje të madhe, ndërsa vetëm gjatë dy ditëve të para të procesit të regjistrimit janë bërë mbi 20 mijë aplikime për votim nga jashtë Kosovës.
Sipas të dhënave të publikuara nga Komisioni Qendror i Zgjedhjeve, numri i aplikimeve ka tejkaluar pritjet fillestare, duke reflektuar një mobilizim të jashtëzakonshëm të mërgimtarëve për t’u bërë pjesë e procesit zgjedhor.
Rritja e interesimit po vërehet sidomos në shtetet evropiane ku jeton numër i madh i diasporës kosovare, përfshirë Gjermaninë, Zvicrën dhe vendet nordike. Në shumë komunitete të mërgimtarëve janë organizuar edhe fushata informuese për regjistrimin dhe pjesëmarrjen në votime.
Përveç aplikimeve online, shumë qytetarë që jetojnë jashtë vendit kanë paralajmëruar edhe ardhjen e tyre në Kosovë për të votuar fizikisht në ditën e zgjedhjeve. Në rrjete sociale janë publikuar dhjetëra fotografi të biletave të rezervuara për muajin qershor, ku mërgimtarët shprehin gatishmërinë për të marrë pjesë drejtpërdrejt në procesin zgjedhor.
Analistët politikë vlerësojnë se diaspora mund të ketë ndikim të rëndësishëm në rezultatin final të zgjedhjeve, duke qenë se pjesëmarrja e saj po shihet dukshëm më e lartë krahasuar me ciklet e kaluara zgjedhore.
KQZ-ja ka bërë thirrje që të gjithë qytetarët jashtë Kosovës të përfundojnë me kohë procesin e aplikimit, ndërsa afati për regjistrim mbetet i hapur deri më 17 maj.
Mobilizimi i madh i diasporës po konsiderohet si një sinjal i interesimit të shtuar të mërgimtarëve për zhvillimet politike në vend dhe për përfshirjen e tyre aktive në vendimmarrje.
