Kryetarja e Kuvendit të Kosovës, Albulena Haxhiu, ka lexuar në seancën e sotme emrat e deputetëve të rinj që marrin mandat në Kuvend pas formimit të Qeverisë Kurti 4.
Ndryshimet në përbërjen e grupit parlamentar vijnë pasi një numër i deputetëve të zgjedhur nga lista e Lëvizjes Vetëvendosje kanë dhënë dorëheqje nga Kuvendi ku kanë marrë poste në kabinetin qeveritar dhe, si rrjedhojë, ulëset e tyre në Kuvend janë plotësuar nga kandidatët pasues në listën zgjedhore. Qeveria Kurti 4 ishte votuar më 13 shtator me 62 vota për.
Sipas të dhënave zyrtare të Kuvendit, Naim Bardiqi e zëvendëson Albin Kurtin, Fitim Haziri e zëvendëson Glauk Konjufcën, ndërsa Egzon Azemi merr mandatin në vend të Donika Gërvalla-Schwarz.
Ilir Qeriqi e zëvendëson Hekuran Muratin, Mimoza Shala merr ulësen e Xhelal Sveçlës, Luan Aliu atë të Hajrulla Çekut, ndërsa Arsim Ademi e zëvendëson Ejup Maqedoncin.
Në Kuvend hyjnë gjithashtu Adelina Trshana në vend të Andin Hotit, Ejup Ahmeti në vend të Arben Vitisë, Filiz Mustafa në vend të Saranda Bogujevcit dhe Agon Batusha në vend të Fitore Pacolli-Dalipit.
Listën e plotësojnë Fahrush Rexhepi, i cili e zëvendëson Artane Rizvanolli-Berishën, Arijeta Rexhepi në vend të Armend Mujës, Elvira Ibrahimi-Hoti në vend të Dimal Bashës dhe Fatos Geci, i cili merr ulësen e Mimoza Kusari-Lilës.
Betimi i deputetëve të rinj ishte paraparë si një nga pikat e para të seancës plenare të 28 shtatorit, krahas deklaratës së Kuvendit lidhur me aktgjykimin e Dhomave të Specializuara dhe çështjeve të tjera parlamentare.
Me këto zëvendësime, deputetët që morën funksione ekzekutive në Qeverinë Kurti 4 nuk vazhdojnë njëkohësisht mandatin në Kuvend, ndërsa vendet e tyre kalojnë te kandidatët pasues sipas procedurave për plotësimin e mandateve.
