Analisti Lirim Mehmetaj ka reaguar ashpër përmes një deklarate publike, duke akuzuar për manipulim të autorësisë së një libri dhe duke ngritur dyshime për qëllime të caktuara politike pas këtij veprimi.
Sipas tij, në momentet kur libri është promovuar dhe ka pasur interes për shitje, autorësia i është atribuar Shkëlzen Gashi. Megjithatë, Mehmetaj pretendon se, pasi janë shtuar kritikat dhe dyshimet mbi përmbajtjen e librit, emri i Gashit nuk është përmendur më si autor.
Ai tutje ka theksuar se në zhvillimet e fundit, autorësia po i atribuohet aktivistes Natasha Kandić, duke e cilësuar këtë si një përpjekje për të shmangur përgjegjësinë dhe për të ndryshuar narrativën publike.
Në reagimin e tij, Mehmetaj ka përdorur gjuhë të ashpër, duke e quajtur këtë një “sistem të rrezikshëm jugosllav”, përmes të cilit, sipas tij, manipulohet opinioni publik dhe fshihen autorët e vërtetë.
Ai ka përmendur edhe deputetin Dimal Basha, për të cilin tha se në një rast të ngjashëm kishte mohuar autorësinë e një pjese të caktuar, duke pretenduar se emri i tij ishte vendosur pa dijeni.
Deklarata e Mehmetajt pritet të nxisë reagime dhe debat në opinionin publik, ndërsa deri më tani nuk ka pasur një përgjigje zyrtare nga personat e përmendur lidhur me këto pretendime.
