Njohësi i çështjeve politike në vend, Albert Krasniqi nga “Demokracia Plus”, ka deklaruar se rezultatet e raundit të dytë në Mitrovicë të jugut ngrenë dyshime të forta për manipulim të procesit zgjedhor.
Ai ka renditur disa nga faktet që sipas tij janë mjaft bindëse:
- Exit poll-i nuk përputhet me rezultatet zyrtare – vetëm në Mitrovicë.
- Pjesëmarrja më e madhe se në raundin e parë – ndër komunat e mëdha, vetëm në Mitrovicë.
- Kandidati i vetëm që ka marrë më pak vota se në raundin e parë – sërish vetëm në Mitrovicë.
- Fletëvotime të gabuara që nuk i përkasin vendvotimit.
Po ashtu ai tha se përveç fakteve zgjedhore, menaxhimi institucional ka qenë i papranueshëm.
- KQZ u ngut ta shpallë “gabim teknik” pa hetim paraprak.
- Kompania e shtypjes mori përgjegjësinë brenda pak orësh – pa asnjë verifikim serioz.
- Prokuroria u mjaftua me deklarata të kompanisë.
- Tenderi u dha si kontratë njëburimor, ndonëse kishte kohë të mjaftueshme për konkurrencë.
- Kompania ka lidhje të njohura me eksponentë të partisë në pushtet.
- Shteti dhe burimet publike janë keqpërdorur për qëllime elektorale – kush e përdor aparatin shtetëror për pushtet, mund ta përdorë edhe për vota.
Krasniqi deklaroi se Mitrovica duhet të shkojë në rivotim për të mbrojtur integritetin e zgjedhjeve dhe demokracinë.
“Nëse e pranojmë këtë si “gabim teknik”, nesër asgjë s’do të garantojë që vota jonë vlen. Po bëjmë regres, për të mbrojtur diçka që e kishim tejkaluar: zgjedhjet e lira dhe të ndershme”.
Ndryshe lajmi dje ka raportuar se si për dallim nga komunat e tjera vetëm në jug të Mitrovicës në balotazh pati dalje më të madhe të votuesve.
Pra 2.86% më shumë ishte për qindja e daljes në votime krahasuar më 12 tetorin, apo njohur ndryshe si raundi i parë i zgjedhjeve.
Në Mitrovicë dyshohet për një “tren bullgar”, ku nga dyshimet e para u morë vendim që të ndalojë numërimi, por më pas prokurori Tmava mori vendim që të rivazhdojë sërish numërimi.
KQZ deklaroi se përgjegjësinë e gabimeve në numrat serik të fletëvotimeve e mori kompania “CETIS”.
