Beograd – Zgjedhjet parlamentare në Serbi po shënojnë një përballje të fortë politike mes kampit të Aleksandar Vuçiqit dhe Lëvizjes Studentore, e cila është shndërruar në sfidën më të madhe ndaj pushtetit të tij gjatë viteve të fundit.
Ndryshe nga Lista Serbe, e cila ka mbështetur politikisht Vuçiqin, Lista Studentore ka dalë në skenë si një alternativë kundërshtare, duke kërkuar luftimin e korrupsionit, forcimin e institucioneve dhe ndryshime në mënyrën e qeverisjes së Serbisë.
Lëvizja studentore u fuqizua pas protestave masive që shpërthyen pas tragjedisë në stacionin hekurudhor të Novi Sadit në nëntor të vitit 2024, ku humbën jetën 16 persona. Protestat, të cilat fillimisht kërkonin përgjegjësi për tragjedinë, më pas u shndërruan në një lëvizje më të gjerë kundër qeverisë dhe korrupsionit.
Lista Studentore ka arritur të mobilizojë një numër të madh qytetarësh, duke u kthyer në një kundërshtare serioze të Partisë Progresive Serbe dhe të Aleksandar Vuçiqit, i cili ka dominuar politikën serbe për më shumë se një dekadë.
Sipas raportimeve të mediave ndërkombëtare, gara zgjedhore është karakterizuar nga një përballje e ngushtë mes kampit të Vuçiqit dhe lëvizjes së mbështetur nga studentët.
Dallimi mes dy listave është i qartë: përderisa Lista Serbe ka qenë në krah të politikës së Vuçiqit, Lista Studentore synon ndryshimin e pushtetit në Serbi dhe hapjen e një kapitulli të ri politik.
Rezultati i këtyre zgjedhjeve pritet të ketë ndikim të rëndësishëm në të ardhmen politike të Serbisë dhe në raportet e saj me rajonin.
Megjithatë, qëndrimi politik i Listës Studentore nuk duhet ngatërruar me një qëndrim të konfirmuar zyrtarisht kundër çdo politike të Vuçiqit në raport me Kosovën, pasi programi i saj është përqendruar kryesisht te korrupsioni, arsimi dhe funksionimi i institucioneve.
