Publicisti Adriatik Riza Dosti ka reaguar ashpër ndaj kryeministrit të Shqipërisë, Edi Rama, duke e kritikuar për qëndrimet e tij ndaj protestave kundër qeverisë dhe për raportet me kryeministrin e Kosovës, Albin Kurti.
Në një shkrim, Dosti ka renditur disa veprime dhe deklarata që, sipas tij, dëshmojnë përshkallëzimin e sjelljes politike të Ramës, duke përmendur edhe fotografinë nga samiti evropian në Budva të Malit të Zi, të publikuar në faqen e kryeministrit shqiptar në Facebook.
Sipas Dostit, në fotografinë e publikuar nga Rama, Kurti është prerë nga pjesa e djathtë e imazhit, ndonëse, siç pretendon publicisti, ai ishte i pranishëm në rreshtin e parë të fotografisë origjinale.
Dosti e ka krahasuar këtë veprim me praktikën e ish-diktatorit komunist Enver Hoxha, i cili, sipas tij, largonte nga fotografitë zyrtare kundërshtarët politikë që binin nga pushteti.
Publicisti ka kritikuar gjithashtu Ramën për qasjen ndaj protestuesve në Shqipëri, duke përmendur përdorimin e blloqeve të gurit para selisë së qeverisë, në vend të karrigeve të vendosura më herët, si dhe pretendimet për masa ndëshkuese ndaj punonjësve që u janë bashkuar protestave.
Në shkrimin e tij, Dosti ka ngritur edhe çështjen e raporteve të Ramës me presidentin e Serbisë, Aleksandar Vuçiq, duke aluduar për mbështetjen dhe ndikimin e tij në qëndrimet e kryeministrit shqiptar.
Ai ka përmendur gjithashtu pretendimet për kërcënime ndaj Kosovës lidhur me pjesëmarrjen e qytetarëve nga Kosova në protestat kundër qeverisë Rama, duke i cilësuar këto zhvillime si shqetësuese.
Në fund të reagimit, Dosti ka përdorur tone të ashpra ndaj kryeministrit shqiptar, duke e përmbledhur kritikën e tij me shprehjen: “Kur çmendet i çmenduri…”
