Një konflikt familjar në fshatin Savrovë të Suharekës ka përfunduar me të shtëna me armë zjarri, ku një 77-vjeçar dyshohet se ka plagosur djalin e tij 40-vjeçar.
Sipas informacioneve, ngjarja ka ndodhur pas një mosmarrëveshjeje që lidhej me raportet familjare. Dyshohet se 40-vjeçari kishte biseduar me djalin e xhaxhait të tij, gjë që e kishte revoltuar të atin, për shkak të marrëdhënieve të tensionuara që ai kishte me vëllain. Në kulmin e debatit, 77-vjeçari dyshohet se ka shtënë me armë zjarri në drejtim të djalit.
Pas incidentit, i dyshuari është barrikaduar në banesë dhe fillimisht ka refuzuar t’u dorëzohej autoriteteve. Pas negociatave me Policinë e Kosovës, ai është bindur të dalë nga shtëpia dhe është arrestuar.
Gjatë kontrollit në vendin e ngjarjes, policia ka sekuestruar një pistoletë, një karikator dhe pesë fishekë të kalibrit 9 milimetra.
I plagosuri fillimisht ka marrë trajtim në Qendrën Emergjente në Suharekë, ndërsa më pas është dërguar në Spitalin e Përgjithshëm të Prizrenit për trajtim të mëtejshëm.
Ndaj 77-vjeçarit është iniciuar procedurë penale nën dyshimin për veprat penale “Lëndim i lehtë trupor”, “Mbajtje në pronësi, kontroll ose posedim të paautorizuar të armës” dhe “Përdorim i armës”.
