Organizatorët e protestave qytetare kanë njoftuar se i kanë vendosur afat qeverisë dhe kryeministrit Edi Rama deri më 21 qershor për t’iu përgjigjur kërkesave të protestuesve.
Sipas tyre, pas më shumë se dy javësh protesta të pandërprera, koha për reflektim po mbaron.
“Data 21 është afati i fundit. Nëse deri atëherë nuk ka reagim konkret dhe masa për kërkesat tona, përgjegjësia për çfarë do të ndodhë më pas bie mbi qeverinë”, deklarojnë organizatorët.
Ata paralajmërojnë se pas kësaj date protestat mund të hyjnë në një fazë të re, me forma të zgjeruara të mosbindjes civile, protesta të zgjatura dhe bllokime të mundshme të akseve kryesore.
Deri më tani nuk ka pasur asnjë reagim zyrtar nga qeveria lidhur me ultimatumit e bërë publik nga protestuesit. Ditët në vijim pritet të jenë vendimtare për zhvillimin e protestës që ka hyrë tashmë në ditën e saj të 16-të.
KËRKESAT E PROTESTUESVE
Protestat qytetare dhe ambientaliste në Tiranë (të emërtuara gjerësisht në media edhe si “Revolucioni i Flamingove”), të cilat nisën pas dhunimit të një aktivisti nga rojet private në zonën e mbrojtur të Zvërnecit, janë strukturuar rreth 5 kërkesave kryesore.
Këto kërkesa shkojnë përtej projektit specifik të resortit turistik, duke prekur të gjithë kuadrin ligjor për mjedisin dhe investimet strategjike në vend:
5 Kërkesat Zyrtare të Protestuesve:
1. Anulimi i menjëhershëm i projektit në Zvërnec: Ndalimi i plotë i çdo plani për ndërtimin e resortit turistik në zonën e Pishë-Poros dhe mbrojtja e ekosistemit të lëngatës Vjosë-Nartë.
2. Dorëheqja e qeverisë: Largimi i kryeministrit Edi Rama dhe kabinetit të tij, të cilët akuzohen nga protestuesit për korrupsion galopant dhe tjetërsim të pasurive publike e kombëtare.
3. Shfuqizimi i kuadrit ligjor për Investitorët Strategjikë: Shfuqizimi i ligjit që u jep statusin e “investitorit strategjik” kompanive të ndryshme, duke u mundësuar atyre marrjen e pronave publike dhe zonave bregdetare me procedura të përshpejtuara.
4. Shfuqizimi i ndryshimeve në Ligjin për Zonat e Mbrojtura: Kthimi pas i ndryshimeve ligjore që lejuan ndërtimin e resorteve të luksit dhe infrastrukturës brenda zonave që më parë gëzonin mbrojtje strikte mjedisore.
5. Shfuqizimi i ligjit “Paketa e Maleve”: Rrëzimi i kësaj nisme ligjore, e cila sipas aktivistëve, i hap rrugë betonizimit dhe shkatërrimit të mjedisit jo vetëm në bregdet, por edhe në zonat malore të vendit.
