Kryeministri i Kosovës, Albin Kurti, ka deklaruar se gjatë mandatit të ardhshëm planifikohet themelimi i Xhandarmërisë së Kosovës, një strukturë e re sigurie që sipas tij do të merret me luftimin e krimit, terrorizmit dhe forcimin e kontrollit në zonat kufitare.
Deklarata e Kurtit ka nxitur reagime të menjëhershme në Serbi, ku mediat pranë presidentit serb Aleksandar Vučić dhe zyrtarë të Beogradit e kanë cilësuar këtë iniciativë si “provokim politik” dhe “strukturë paraushtarake”.
Sipas Kurtit, Xhandarmëria do të funksionojë si një forcë ndërmjet policisë dhe ushtrisë, e ngjashme me modelet që përdoren në disa shtete evropiane si Italia dhe Franca. Ai theksoi se njësia e re do të fokusohet kryesisht në sigurinë kufitare, luftën kundër korrupsionit dhe menaxhimin e situatave me rrezik të lartë.
Ndërkohë, drejtori i Zyrës për Kosovën në Qeverinë serbe, Petar Petkoviq, deklaroi se vetëm KFOR-i ka mandat ushtarak në Kosovë dhe se Prishtina nuk duhet të krijojë struktura të reja sigurie jashtë marrëveshjeve ekzistuese.
Analistët e sigurisë në Kosovë e kanë parë këtë hap si pjesë të forcimit të institucioneve shtetërore dhe rritjes së kontrollit në veri të vendit, zonë e cila ka qenë shpesh vatër tensionesh mes Prishtinës dhe Beogradit.
Debati për Xhandarmërinë pritet të ndikojë edhe në raportet Kosovë–Serbi, në një periudhë kur dialogu mes dy vendeve vazhdon të mbetet i tensionuar dhe nën vëmendjen e Bashkimit Evropian.
