Brenda Partia Demokratike e Kosovës (PDK) po zhvillohen diskutime intensive lidhur me situatën aktuale politike në vend dhe skenarët e mundshëm për dalje nga kriza institucionale. Sipas burimeve të afërta me këtë parti, një nga opsionet që po shihet gjithnjë e më seriozisht është shkuarja në zgjedhje të reja, të cilat, sipas tyre, mund t’i konvenonin vetë PDK-së, shkruan Gazeta Minuti.
Këto burime bëjnë të ditur se brenda strukturave të partisë po vlerësohet se një proces i ri zgjedhor do të krijonte rrethana më të favorshme për rikthimin e fuqishëm të PDK-së në skenën politike. Në këtë kontekst, përmendet edhe emri i ish-presidentit Hashim Thaçi, për të cilin thuhet se ekziston bindja brenda disa qarqeve të partisë se deri në një periudhë të mundshme zgjedhore, ai mund të rikthehet në Kosovë, çka do të ndikonte ndjeshëm në dinamikat politike.
Sipas këtyre zërave, rikthimi eventual i Thaçit do të mobilizonte elektoratin tradicional të PDK-së dhe do të ndryshonte “lojën politike” në vend, duke i dhënë kësaj partie një avantazh të ri përballë kundërshtarëve politikë. Megjithatë, këto mbeten diskutime të brendshme dhe jo qëndrime zyrtare të partisë, njofton Gazeta Minuti.
Ndërkohë, në aspektin formal, burimet tregojnë se PDK pritet të ndjekë procedurat kushtetuese sa i përket procesit të zgjedhjes së presidentit. Mësohet se kjo parti do të propozojë dy emra për postin e presidentit, në përputhje me kërkesat procedurale, por kjo lëvizje shihet më shumë si përmbushje e obligimeve formale sesa si një zgjidhje përfundimtare e situatës.
Kjo qasje, sipas analistëve politikë, lë të kuptohet se PDK po mban të hapura të gjitha opsionet – nga pjesëmarrja në procesin e zgjedhjes së presidentit, deri te mbështetja për një skenar të ri zgjedhor, në varësi të zhvillimeve të ardhshme politike.
Situata mbetet dinamike dhe pritet që ditët në vijim të sjellin më shumë qartësi, sidomos nëse do të ketë pajtim mes partive për zgjedhjen e presidentit apo nëse vendi do të shkojë drejt zgjedhjeve të reja, të cilat, sipas burimeve brenda PDK-së, mund të ndryshojnë rrënjësisht balancat aktuale politike në Kosovë.
