Së fundmi, në kanalin YouTube janë rishfaqur disa video të vjetra nga spektaklet televizive shqiptare, duke sjellë në kujtesë momente të paharrueshme për publikun.
Një nga videot që ka tërhequr më shumë vëmendje është episodi i parë i Big Brother Albania, i transmetuar më 23 shkurt 2008.
Në atë kohë, formati sapo po debutonte në Shqipëri, ndërsa drejtuesi i Top Media, Dritan Hoxha, ishte ende gjallë.
Videoja e publikuar rishtas tregon hapjen madhështore të spektaklit nga prezantuesja ikonike, Arbana Osmani, e cila ka qenë pjesë e këtij programi për shumë edicione.
Duke qenë se jemi në prag të finales së Big Brother VIP Albania 4, kjo video ka mallëngjyer fansat, të cilët janë rikthyer pas në kohë për të parë një version më autentik të formatit, atëherë kur ai organizohej pa personazhe të famshëm.
Në total, 10 edicione të Big Brother Albania janë mbajtur me konkurrentë të panjohur për publikun, ndërsa katër të fundit kanë qenë edicione VIP, duke përfshirë edhe këtë të vitit 2024.
Rishfaqja e këtyre videove ka nxitur diskutime të shumta në rrjetet sociale, me shumë ndjekës që krahasojnë origjinën e formatit me versionin e tij aktual, duke shprehur nostalgji për periudhën kur Big Brother kishte një qasje më spontane dhe të papritur.
