Trajneri i Real Madridit, Carlo Ancelotti ka folur pasi skuadra e tij siguroi finalen e Superkupës së Spanjës.
Kampioni i Spanjës dhe ai evropian, sonte mposhti në gjysëmfinale skuadrën e Mallorcas, me rezultat 3-0, shkruan IndeksOnline.
Pavarësisht fitores, Ancelotti tha se skuadra e tij nuk luajti në nivelin që dëshironin, por e merituan fitoren.
Ai foli edhe për finalen e madhe, ku do të përballen me Barcelonën, duke thënë se ”El Clasico” gjithmonë është e paparashikueshme.
“Ne nuk kemi luajtur në nivelin tonë më të mirë, por kemi parë një version të mirë të ekipit dhe e merituam të fitonim. Ne kemi bërë mirë në të kaluarën. Pas lëndimit të Tchouameni , Raul Asencio ka ardhur mirë. Kundër Barcelonës do të përpiqemi të mbrohemi dhe të sulmojmë mirë sepse ky është futbolli.
Në kohët e fundit El Clasico ka qenë gjithmonë e paparashikueshme. Ka pasur ndeshje që ne i kemi fituar lehtësisht dhe të tjera në të cilat ata na kanë mundur 0-4. Është e vështirë të mendosh se si do të jetë finalja, por do të jetë argëtuese sepse ka shumë cilësi në fushë. Nuk e di si mund të jetë. “Ne duam të bëjmë më mirë se Barcelona.”, deklaroi Ancelotti.
Finalja mes Real Madridit dhe Barcelonës zhvillohet të dielen më 12 janar, më fillim nga ora 20:00./IndeksOnline/
