E anashkaluar shpesh nga komuniteti ndërkombëtar në një botë të përfshirë nga kriza të vazhdueshme, Serbia, një anëtare aspirante e Bashkimit Evropian, e ka gjetur veten në një “udhëkryq” mes ndjekjes së së ardhmes së saj brenda bllokut ose qëndrimit brenda orbitës së Moskës.Pavarësisht premtimit për prosperitet më të madh brenda BE-së, Serbia i është afruar Kremlinit, i cili e ka pasur gjithmonë në vëmendjen e tij Ballkanin. Vendi ka qenë historikisht i afërt me Rusinë. Në kohët moderne, kjo marrëdhënie “u çimentua” nga Rusia që mbështeti kundërshtimin e Serbisë ndaj pavarësisë së Kosovës. Kremlini ishte kundër që provinca të bëhej një komb i pavarur dhe sugjeroi se kjo do të ishte një shkelje e ligjit ndërkombëtar. Gjithashtu vendi ka refuzuar të ndjekë pjesën tjetër të Evropës në vendosjen e sanksioneve ndaj aleatit të saj të vjetër për pushtimin e Ukrainës. Megjithatë, asgjë nuk vjen pa kosto, dhe në rastin e lidhjeve me Rusinë, Serbia po paguan një çmim tejet të lartë. Ndaj, duket se dhe vetë presidenti serb Aleksandër Vuçiç më në fund “po hap sytë”, duke kuptuar pasojat, herë të vogla, e herë katastrofike për të, por edhe vendin që ai udhëheq.
Serbia nën presion
“Do të përpiqem të shpjegoj tablonë politike dhe ekonomike në të cilën ndodhet Serbia aktualisht, si dhe hapat që do të ndërmarrim”, tha presidenti i Serbisë, Aleksandar Vuçiç, në një fjalimin nga Pallati i Serbisë ditën e djeshme. Vuçiçshtoi se Serbia është në një situatë të vështirë politike. “Sigurisht që mund të mendoni për fajin tuaj, por këtë herë do të bëj një analizë, po vërtet, jo për fajin tonë, më mirë do të thosha, për shkak të situatës në botë, ne po paguajmë një çmim shumë të lartë”, sqaroi presidenti. “Së pari, do të shihni se bëhet fjalë për presion të përgjithshëm mbi Serbinë dhe popullin serb për shkak të pozicionit tonë ushtarako-politik dhe neutralitetit ushtarak”, tha ai. Së dyti, sipas tij arsyeja e presionit është qëndrimi ndaj Ukrainës dhe qëndrimit të Serbisë që dënon sulmin ndaj Ukrainës dhe nuk i bashkohet sanksioneve kundër Rusisë. “Arsyeja e tretë që lidhet me të dyja të përmendura është se vendet perëndimore ndjejnë presion të madh për shkak të avancimit të forcave ruse dhe pasigurisë se si do të përfundojë konflikti dhe ndoshta mesazhet e ardhshme nga Rusia, që do të ishte një precedent si Kosova”, shtoi më tej Vuçiç.
Integrimi europian
Ai deklaroi se populli serb zakonisht vihet në sulm kur “duhet të dalim nga duart e Vladimir Putinit”. “Situata në Ukrainë na çon në një situatë pothuajse të pamundur, sepse jemi në rrugën evropiane, nga e cila nuk kemi hequr dorë, por pozicioni ynë do të jetë gjithnjë e më i vështirë dhe i ndërlikuar. A është Samiti i BRICS në tetor? Kush e di, ndoshta një qeveri e re do të marrë një ftesë për diçka të tillë. A më thirrën? Jam i ftuar? Unë nuk e kuptova kështu. Faleminderit për ftesën. Ivica është informuar, por unë jo. Do ta konsiderojmë kur të vijë koha. Ne krijojmë skedarë të mëdhenj, gjithçka do të mbetet në histori”, tha presidenti serb.
Anëtarësimi i Kosovës në KiE
Megjithatë, ai specifikoi se tema më e rëndësishme për Serbinë është çështja e Kosovës dhe anëtarësimi i mundshëm i të ashtuquajturës Kosovë në Këshillin e Evropës. “Populli ynë është në një situatë të vështirë në Kosovë”, tha ai. “Për ne paqja është interes prioritar, për ne paqja ka rëndësi të madhe, kemi marrë rezultatet e fundit ekonomike për muajin shkurt për Serbinë dhe do të jenë më të mëdha se sa prisnim. Nuk jam i sigurt që të tjerët mund të krenohen për këtë”, shtoi Vuçiç. Po ashtu ai shtoi se kur Kurti nuk ishte në pushtet, kishte dukshëm më pak sulme ndaj serbëve dhe pronës serbe. Sponsorët e Kurtit, tha Vuçiç, dhe këshilltarët e tij pretendojnë se bëhet fjalë për zbatimin e sundimit të ligjit kur bëhet fjalë për pranimin e Kosovës në Këshillin e Evropës.Presidenti i Serbisë, rikujtojmë, paraprakisht deklaroi se Serbisë i presin ditë të vështira dhe paralajmëroi se së shpejti do t’i informojë qytetarët për të gjitha sfidat që e presin. Megjithatë, ai nuk specifikoi se për çfarë bëhej fjalë ekzaktësisht.
