Ministri kroat i Ekonomisë, Davor Felipoviq, në Forumin Ekonomik Kosovë – Kroaci ka folur për bashkëpunimin mes dy vendeve e luftën në Ukrainë.
Felipoviqi tha se Kosova ka vuajtur shumë dhe qytetarët e saj e meritojnë një të ardhme evropiane, teksa shtoi se sikurse Ukraina, edhe Kosova e Kroacia kanë kaluar nëpër shkatërrimet e luftës.
“Kroacia dhe Kosova kanë dënuar agresionin në Ukrainë dhe sikurse Ukraina, edhe Kosova edhe Kroacia kanë kaluar nëpër këto shkatërrime të luftës dhe ne i kuptojmë më së miri ndjenjat e tyre, por ne duhet të përpiqemi që t’i ndihmojmë popullit të Ukrainës për ta arritur lirinë”, është shprehur Felipoviqi, njofton klankosova.
Tutje, ai tha se shteti kroat është i kënaqur që gjatë 10 muajve të parë të vitit 2022 shifrat tregtare të eksportit kanë arritur në 105 milionë, ndërsa importet nga Kosova në 10 milionë.
“Kemi intensifikuar bashkëpunimin me Kosovën dhe shohim mundësi të ndryshme në sektorin e energjisë, ndërtimin e rrugëve, ndërtimtari, pajisje ushtarake dhe pajisjet e inteligjencës”, tha Felipoviqi.
