Deputeti nga radhët e Lëvizjes Vetëvendosje, Artan Abrashi, ka shpërndarë në dokument, që pretendohet të jetë lëshuar nga Ministria e Brendshme e Serbisë, ku jepet një paralajmërim për ushtrinë dhe policinë serbe “për ngjarje të panjohura që pritet të ndodhin më 24 shtator”.
Sipas Abrashit, pas Rusisë, mobilizimi po bëhet edhe në Serbi.
“Pas mobilizimit në Rusi, bëhet edhe mobilizimi në Serbi”, ka shkruar Abrashi.
Në dokumentin e publikuar nga Abrashi, që mban vulën e Ministrisë së Punëve të Brendshme dhe të ashtuquajturës Sindikatë e Punëtorëve të Policisë, bëhet thirrje që “me rastin e ngjarjeve globale, që pritet të ndodhin më datë 24 shtator 2022, të mos krijohet frikë dhe panik sepse gjithçka do të përfundojë mirë”.
Aty flitet edhe për ata që “nuk e kanë kuptuar të vërtetën”.
“Të gjithë duhet të kalojnë nëpër këtë periudhë, sidomos ata të cilët nuk e kanë kuptuar të vërteten dhe atë që kanë besuar (masmdias dhe politikanëve). Dhe nuk bëhet fjalë vetëm për Serbinë, por për të gjitha shtetet”, thuhet tutje.
Në fund, ushtarëve dhe policiëve u kërkohet që më 24 shtator të rrinë në kazermat dhe afër objekteve të tyre.
“Lutje të veçantë të gjithë pjesëtarëve të ushtrisë që të jenë në kazermat e tyre dhe pjesëtarëve të policisë të jenë afër objekteve të rëndësishme”, thuhet në fund.
