Ish-kryeministri i Kosovës nga radhët e LDK, Avduallah Hoti është takuar në Vjenë me të dërguarin special të SHBA-së për Ballkanin Perëndimor Gabriel Escobar.
Hoti ka thënë se është takuar me Escobar në kuadër të EPP dhe kanë diskutuar për zhvillimet e fundit në dialog.
“Diskutuam për zhvillimet e fundit në dialog dhe hapat që duhet ndërmarrë në përputhje me vizionin tonë të përbashkët dhe afatgjatë për Kosovën e integruar plotësisht në strukturat euro-atlantike”, ka shkruar ai në Facebook.
Escobar javën e kaluar ka qëndruar në Kosovë ku është takuar me presidenten Vjosa Osmani, kryeministrin Albin Kurti dhe përfaqesues të partive opozitare.
Escobar dhe i dërguari i posaçëm i Bashkimit Evropian për dialogun mes Kosovës dhe Serbisë, Mirosllav Lajçak, kanë realizuar vizita në Prishtinë dhe Beograd në përpjekje për të bindur palët që të arrijnë marrëveshje për tejkalimin e tensioneve në veri të Kosovës si dhe për çështjen e targave të veturave dhe dokumentet serbe.
