Përmes një postimi në Facebook, ai rikthen në vëmendje zhvillimet e Konferencës së Rambujesë, mbështetjen amerikane për Kosovën dhe pretendimet për lidhje të ish-presidentit Hashim Thaçi me shërbimet franceze e serbe. Geci ngre kritika për rolin e tij politik dhe kërkon përgjegjësi për mënyrën se si është trajtuar sakrifica e popullit të Kosovës.
Veprimtari Halil Geci ka reaguar përmes një postimi në Facebook, ku ka ngritur pikëpyetje lidhur me rolin e ish-presidentit Hashim Thaçi në procesin e Rambujesë dhe zhvillimet që pasuan deri te pavarësia e Kosovës. Ai e ka cilësuar Thaçin me nofkën “Xhorxh Uashingtoni i Kosovës”, duke vënë në pikëpyetje se si një figurë që, sipas tij, kishte gëzuar mbështetjen e fuqishme amerikane, përfundoi në paraburgim në Hagë.
Në postimin e tij, Geci përsërit pretendimet për lidhje të Thaçit me shërbimin francez DGSE dhe shërbimin sekret serb UDB, duke iu referuar edhe deklarimeve të ish-kreut të shërbimit sekret shqiptar, Fatos Klosi. Ai pretendon se ekzistonin plane që Kosova të mbetej nën ndikimin e Serbisë, por këto pohime i paraqet si pjesë të interpretimit të tij politik.
Duke iu referuar Konferencës së Rambujesë, Geci rikujton rolin e diplomacisë amerikane dhe të ish-sekretares së Shtetit, Madeleine Albright, ndërsa pretendon se Thaçi kishte vonuar nënshkrimin e marrëveshjes, duke i dhënë Serbisë kohë shtesë për përgatitje ushtarake. Ai përmend edhe librin e Albrightit, “Madam Secretary: A Memoir”, si pjesë të argumentimit të tij.
Geci kritikon atë që e konsideron përvetësim të sakrificës së popullit shqiptar dhe të luftës së UÇK-së për interesa personale. Sipas tij, asnjë individ nuk ka të drejtë ta shndërrojë sakrificën kombëtare në përfitim personal apo ta rishkruajë historinë sipas interesave të veta.
Në fund, ai thekson rëndësinë e rolit të Ibrahim Rugovës, mbështetjes amerikane dhe perëndimore, luftës së UÇK-së dhe sakrificës së dëshmorëve në rrugën e Kosovës drejt lirisë. Megjithatë, pretendimet e ngritura në postimin e tij për lidhjet e Thaçit me shërbimet sekrete dhe motivet e arrestimit mbeten akuza dhe interpretime të autorit, jo fakte të vërtetuara.
Postimi i plotë:
AMERIKA INVESTOI MILIARDA PËR KOSOVËN E PAVARUR — SI PËRFUNDOI NË BURG “XHORXH UASHINGTONI I KOSOVËS”?
Hashim Thaçi, alias “Xhorxh Uashingtoni i Kosovës”, ra në burg me lotë në sy, pa mundur ta jetësojë marrëveshjen e pretenduar të DGSE-së franceze dhe UDB-së, që Kosova të mbetej nën tutelën serbe, me autonominë që dikur ia kishte dhënë marshall Titoja! Kështu, së paku, shprehet Fatos Klosi, njeriu që drejtonte shërbimin sekret shqiptar të asaj kohe.
Hashim Thaçi, me lotë në sy, nuk mund ta jetësojë marrëveshjen që, sipas këtij interpretimi politik, lidhet me shërbimin francez DGSE dhe UDB-në. Sipas kritikëve, Franca dhe Serbia kishin aleanca të vjetra bashkëpunimi.
Polari në Rambuje, i rrethuar nga amerikanët, anglezët dhe gjermanët, i ishte ngushtuar rrethi ose të nënshkruante, ose të përballej me zbulimin e lidhjeve të tij me kundërshtarët e Kosovës nga të cilët ishte regrutua.
Ma vonë u pa se ai e përvetësoi gjakun dhe sakrificën e këti populli në emër të UÇK-së, për t’u pasuruar në kurriz të Dardanisë
Se Hashim Thaçi ishte agjent i shërbimit francez DGSE, e dinë e gjithë bota shqiptare, por edhe Amerika, ndërsa vëllai i tij, Gani Thaçi, ishte i lidhur me UDB-në. Po ashtu, pretendohet se synimi i tyre ishte që Kosovës t’ia kthenin autonominë e dikurshme, nën tutelën serbe.
Në Rambuje, sipas interpretimit të sekretares së Shtetit amerikan, Madeleine Albright, Thaçi nuk e nënshkroi marrëveshjen në rundin e parë, duke i dhënë Serbisë kohë shtesë prej tri javësh, që të pozicionohej ushtarakisht dhe ta mbushte Kosovën me mbi 50 mijë ushtarë, për të forcuar pozitat e saj ushtarake në vend.
Vetëm pas kësaj periudhe u nënshkrua marrëveshja. Serbia vazhdoi masakrat kundër popullsisë civile dhe më pas ndërhyri NATO-ja.
Ky është interpretimi kritik për rolin e Hashim Thaçit në Rambuje.
Rambujeja ishte një moment historik për Kosovën. Marrëveshja u arrit në rrethana të jashtëzakonshme, nën trysninë e diplomacisë ndërkombëtare dhe me përfshirjen vendimtare të Shteteve të Bashkuara të Amerikës, veçanërisht të sekretares së atëhershme të Shtetit, Madeleine Albright.
Sipas këtij rrëfimi, Madeleine Albright kishte shprehur zhgënjim për mbështetjen që i ishte dhënë Hashim Thaçit për drejtimin e delegacionit të Kosovës. Ky pretendim, lidhet edhe me përmbajtjen e librit të Madeleine Albrightit quhet Madam Secretary: A Memoir, në shqip: Zonja Sekretare: Kujtime. U botua për herë të parë në vitin 2003.
Amerikanët u përpoqën ta afronin Thaçin me diplomacinë perëndimore, duke e cilësuar si një lloj “Xhorxh Uashingtoni të Kosovës”. Por pyetja që shtroj është kjo: si përfundoi XHORXH WASHINGTONI NË BIRUCË
Për mua, kjo është një pyetje politike që kërkon përgjigje. Nëse një udhëheqës e cenon projektin strategjik të një shteti që ka investuar miliarda për lirinë dhe pavarësinë e Kosovës, atëherë ai duhet të mbajë përgjegjësi politike dhe historike. Sipas këtij interpretimi politik, pretendimi se Thaçi synonte t’ia dorëzonte projektin e Kosovës Rusisë dhe Serbisë lidhet me arsyen pse Amerika ia tregoi vendin dhe ai përfundoi në burg, nën akuzat për vrasjen e kundërshtarëve politikë shqiptarë.
Për Kosovën, Rambujeja shënoi një moment vendimtar drejt ndërhyrjes së NATO-s dhe çlirimit nga regjimi serb. Ajo ishte një periudhë përplasjesh, presionesh dhe vendimesh të rënda politike.
Po të mos ishin masakrat që Serbia kreu mbi popullsinë civile, ndërhyrja e NATO-s nuk do të kishte pasur të njëjtin kontekst politik dhe humanitar. Roli i Ibrahim Rugovës, i diplomacisë amerikane, i NATO-s dhe i UÇK-së ishte thelbësor në rrugën e Kosovës drejt lirisë.
Adem Jashari u bë simbol i qëndresës dhe i sakrificës për liri. Pa luftën dhe sakrificën e UÇK-së, historia e Kosovës do të kishte marrë një rrjedhë krejt tjetër.
Kosova nuk duhet ta harrojë diplomacinë e Ibrahim Rugovës, mbështetjen e Amerikës dhe të aleatëve perëndimorë, luftën çlirimtare, dëshmorët dhe popullin që sakrifikoi gjithçka për liri.
Askush nuk ka të drejtë ta përvetësojë gjakun e dëshmorëve, ta kthejë sakrificën kombëtare në pasuri personale apo ta rishkruajë historinë sipas interesave të veta!