Këngëtari dhe fituesi i Big Brother VIP Albania 2, Luiz Ejlli, ka konfirmuar rikthimin e tij në ekranin e Top Channel, këtë herë me një projekt të ri televiziv.
I ftuar në emisionin “Fiks Fare”, Luizi u pyet nga Jul Deda dhe Xhemi Shehu për formatin e ri që do të drejtojë. Ai zbuloi se emisioni nuk do të transmetohet çdo ditë, por një herë në javë.
“Unë do filloj një projekt që e kam pas gjithmonë ëndërr ta bëj. Do jetë njëherë në javë, të premten në darkë,” u shpreh Luiz Ejlli.
Me këtë deklaratë, ai konfirmoi zyrtarisht rikthimin në Top Channel, ndërsa detaje të tjera për formatin, konceptin apo datën e nisjes ende nuk janë bërë publike.
Publiku tashmë pret të mësojë më shumë rreth projektit që vetë Luizi e cilëson si një ëndërr të kahershme.
