Taksisti shqiptar, Hazir Stublla është bërë i famshëm së fundmi në Gjermani pasi e ka gjetur kuletën e Manuel Neuerit. Portieri gjerman e shpërbleu taksistin shqiptar për këtë veprim. Por, Stublla e ka quajtur portierin gjerman si dorështrënguar pasi nuk ia dha shpërblimin e merituar.
“Kuleta e kishte emrin dhe adresën e Neuerit”, ka thënë Stublla për mediumin gjerman “Bild”.
Ai ka zbuluar se në kuletë gjendeshin 800 euro kesh, një kartë Visa Platinum dhe një Mastercard. Mediumi gjerman tutje shkruan se taksisti shqiptar u përpoq ta gjente portierin gjerman duke shkuar direkt në shtëpi të tij.
Aty nuk e gjeti veteranin e portës dhe më pas shkoi në qendrën stërvitore të Bayernit dhe ia dorëzoi kuletën menaxherit të tij. Stublla besoi se do ta merrte një dhuratë që e meriton, por në fund u dëshpërua, pasi e mori një fanellë të panënshkruar nga portieri gjerman.
Por, pati një fund të lumtur për taksistin shqiptar. Legjenda e Bayern Munichut, Lothar Matthäus e bleu fanellën nga shoferi i taksisë për 1000 franga.
“Unë e di nga përvoja ime se si është të humbasësh portofolin. Problemi është përpjekja më pas. Përkushtimi i Hazirit më duket edhe më i vlefshëm për t’i shpëtuar Manuelit nga telashet”, citohet të ketë thënë Matthäus.
Dhe taksisti thotë i lumtur: “Më pëlqeu Lothar si lojtar, por tani ai është heroi im”.
Me 1000 franga, ai kërkon të riparojë makinën e tij private dhe të dalë për akullore me fëmijët e tij.
