Kjo javë pritet të jetë vendimtare për zhvillimet politike në vend, pasi që Gjykata Kushtetuese e Kosovës pritet të dalë me një vendim që do të qartësojë situatën e krijuar rreth zgjedhjes së presidentit dhe dekretit për shpërndarjen e Kuvendit.
Në qendër të kësaj çështjeje është masa e përkohshme e vendosur nga Kushtetuesja, e cila është në fuqi deri më 31 mars dhe që pezullon zbatimin e dekretit të nxjerrë nga presidentja Vjosa Osmani për shpërndarjen e Kuvendi i Kosovës.
Sipas burimeve të Gazeta Minuti, procesi i vendimmarrjes në Kushtetuese tashmë është në fazën përfundimtare dhe pritet që shumë shpejt të jepet një epilog përfundimtar. Të njëjtat burime bëjnë të ditur se një nga opsionet që po shqyrtohet është dhënia e një afati shtesë për kryeministrin Albin Kurti, në mënyrë që të sigurojë zgjedhjen e presidentit dhe të shmanget një krizë më e thellë institucionale.
Vendimi, sipas këtyre burimeve, mund të merret më së largu deri nesër, duke e bërë këtë një moment kyç për të ardhmen politike të vendit. Nëse i jepet një mundësi e re qeverisë, atëherë pritet që të intensifikohen përpjekjet për arritjen e konsensusit politik dhe sigurimin e votave të nevojshme për zgjedhjen e presidentit.
Ndërkohë, kërkesa për vlerësimin e kushtetutshmërisë së dekretit për shpërndarjen e Kuvendit ishte dorëzuar nga vetë kryeministri Kurti në emër të Qeverisë, duke e çuar çështjen në një nivel të lartë institucional dhe duke kërkuar interpretim përfundimtar nga organi më i lartë kushtetues në vend.
Vendimi i Kushtetueses pritet të ketë ndikim të drejtpërdrejtë në stabilitetin politik dhe institucional të Kosovës, duke përcaktuar qartë hapat e ardhshëm që do të ndërmerren në procesin e zgjedhjes së presidentit dhe funksionimit të institucioneve.
