Sipas burimeve të Gazeta Minuti, në takimin e fundit politik mes kryeministrit Albin Kurti dhe kryetarit të PDK-së Bedri Hamza, është diskutuar gjerësisht për skenarët e mundshëm rreth zgjedhjes së Presidentit të ardhshëm të Kosovës.
Burime të afërta me këtë takim bëjnë të ditur se në tryezë janë përmendur disa emra potencialë për postin e kreut të shtetit, përfshirë edhe figura që vijnë nga familja Jashari, emër me peshë historike dhe simbolike për Kosovën.
Në këtë kontekst, sipas të njëjtave burimeve, Bedri Hamza i ka bërë të qartë Kurtit se PDK nuk garanton votat për një kandidaturë eventuale të Bekim Jashari për president. Arsyeja kryesore e këtij qëndrimi, thuhet se lidhet me raportet e Bekim Jasharit me Sami Lushtaku, çka sipas Hamzës, e vështirëson arritjen e një konsensusi të gjerë politik në Kuvend.
Ndërkohë, burimet e Gazeta Minuti theksojnë se qëndrimi i Hamzës ka qenë më i hapur sa i përket një kandidature eventuale të Murat Jashari. Sipas këtyre informacioneve, Hamza ka lënë të kuptohet se për këtë emër “edhe mund të diskutohet”, duke mos e përjashtuar mundësinë e mbështetjes, nëse arrihet një marrëveshje politike më e gjerë ndërmjet subjekteve parlamentare.
Takimi Kurti–Hamza, sipas burimeve, është zhvilluar në kuadër të konsultimeve që po mbahen ndërmjet liderëve politikë për të gjetur një figurë konsensuale për postin e Presidentit, në mënyrë që të shmanget një krizë institucionale dhe bllokadë politike në Kuvend.
Po ashtu, mësohet se Kurti ka insistuar në nevojën që kandidati për president të ketë profil unifikues, të mos jetë figurë përçarëse dhe të ketë pranim të gjerë në skenën politike dhe në opinionin publik. Në këtë linjë, përfshirja e emrave nga familja Jashari në diskutime është parë si përpjekje për të gjetur një kandidat me peshë morale dhe simbolike për shoqërinë kosovare.
Megjithatë, burimet nënvizojnë se aktualisht nuk ka ende marrëveshje konkrete për asnjë emër dhe se diskutimet janë në fazë eksploruese.
Qëndrimi i PDK-së për kandidaturën e Bekim Jasharit shihet si sinjal se ky subjekt nuk është i gatshëm të japë mbështetje automatike për çdo emër që përmendet, por kërkon zgjidhje që garanton stabilitet politik dhe unitet institucional.
Gazeta Minuti do të vazhdojë të përcjellë zhvillimet rreth negociatave politike për zgjedhjen e Presidentit, ndërsa pritet që në ditët në vijim të ketë takime të tjera mes liderëve të partive parlamentare, ku emrat e përmendur në këtë takim pritet të rikthehen sërish në diskutim.
