Kush mund t’i bjerë në fije se çfarë po ngjan në Mal të Zi!
Kaosi ndodhi me tifozët “Arpagjikët” e Bashkimit të Prizrenit, ku disa u arrestuan dhe njëri me procedurë rekorde u dërgua në burgim dhjetë ditë në Mal të Zi!
Kjo ndodhi më 23 tetor me tifozët e basketbollit të Bashkimit, të cilët ishin duke u kthyer nga Italia.
E gjithë çudia ndodhi në Igallo për shkak grafitit UÇK (Ushtria Çlirimtare e Kosovës), ushtri që e luftojë okupatorin serb në fund të viteve të 90-ta.
Sot ndodhi çudia tjetër po me shqiptarët.
Policia e Malit të Zi urdhëron të shtyhet ndeshja në stadiumin “Besa” në Tuz mes skuadrës shqiptare Deçiqi dhe Buduçnostit të Podgoricës, për shkak të sigurisë.
“Së pari shiu, pastaj Departamenti i Policisë: derbi Deçiqi – Buduçnosti shtyhet përsëri”, është titulli i mediumit malazez “Vijesti”.
Për cilën siguri bëhet fjalë?
Kjo është çështje e policisë malazeze!
Po pse bash me shqiptarët?
“Ndeshja Deçiq – Buduçnosti shtyhet për arsye sigurie në shtet, me urdhër të policisë”, – thuhet në njoftimin e klubit Deçiqi.
A mos vallë incidenti që ndodhi në ligën e dytë mes skuadrave malazeze në Nikshiq, Internacional e Berane, është shkaktar i frikës, ku tifozët u futen në fushë dhe pati rrahje masive?
Askush nuk e di përse u shty ndeshja Deçiq – Buduçnosti, pos që thuhet për shkaqe sigurie.
