Derisa kryeministri i Shqipërisë, Edi Rama merrte përqafime nga liderët evropianë, kryeministri në detyrë i Kosovës Albin Kurti sot mori kritika e mesazhe në lidhje me veprimet e tij të fundit, shkruan Periskopi.
Duke iu referuar si kryeministër në largim, Bashkimi Evropian i ka reaguar Albin Kurtit lidhur me aksionet e fundit që janë zhvilluar në veri të vendit.
Nga BE, janë shprehur veçanërisht të shqetësuar me operacionet kundër kompanisë Vodovod Ibar në Mitrovicën e Veriut dhe kompanisë së shërbimeve publike në Zubin Potok, të cilat ofrojnë shërbime bazike për komunitetet që jetojnë në pjesën veriore të Kosovës, duke theksuar se veprimet e njëanshme dhe ato të pakoordinuara dëmtojnë përpjekjet për ndërtim të besimit ndërmjet komuniteteve.
“Si Kosova, ashtu edhe Serbia, u bëhen thirrje të angazhohen në mënyrë konstruktive në dialogun e lehtësuar nga BE për zbatimin e Marrëveshjes për rrugën drejt normalizimit dhe Aneksit të Zbatimit, si dhe të marrëveshjeve të tjera të arritura në kuadër të këtij dialogu, pa vonesa apo parakushte të mëtejshme. Kjo përfshin edhe themelimin e Asociacionit/Komunitetit të Komunave me Shumicë Serbe. Normalizimi i marrëdhënieve është një kusht thelbësor për rrugën evropiane të të dyja palëve”, thuhet mes tjerash nëreagimin e BE.
Në anën tjetër, Kurti sot u kritikua nga Gjermani dhe Britania e Madhe në lidhje me zhagitjen e konstituimit të Kuvendit dhe për sulmet që partia më e madhe në vend, Vetëvendosje po bën vazhdimisht ndaj mediave dhe gazetarëve.
Ambasadori i Gjermanisë në Kosovë, Jorn Rohde, kur u pyet se cila është zgjidhja që të dilet nga ngërçi politik, ai e ndërlidhi situatën me një lojë futbolli.
“Edhe në një lojë futbolli, nëse dështon, duhet të ndërrohet lojtari”, u shpreh shkurt Rohde, duke iu referuar dështimit të Albulena Haxhiut për të marrë votat e nevojshme për t’u zgjedhur kryeparlamentare.
Ndërsa, në anën tjetër ambasadori britanik Jonathan Hargreaves, pas një takimi që pati me kryetarin e AGK’së Xhemajl Rexha dhe juristen e medias Flutura Kusari, u shpreh i shqetësuar me pengesat e fundit në mjedisin e gazetarisë së lirë
“Kosova duhet të jetë krenare për të kaluarën e saj demokratike, por pengesat e fundit në mjedisin e gazetarisë së lirë, të pavarur dhe të patrembur janë shkak për shqetësim.”, ka shkruar ambasadori në Facebook.
Por, edhe pas thirrjeve nga ndërkombëtarët, sulmet ndaj gazetarëve vazhduan. Ishte ministrja në detyrë e punëve të Jashtme, Donika Gërvalla e cila sot i quajti mediat “produkt i krimit të organizuar”.
Ky reagim i saj erdhi, duke tentuar t’i dal në mbrojtje ministrit në detyrë, Faton Pecit, e që mediat raportuan rreth skandaleve në ministrinë që ai drejton./PERISKOPI
