Këta dhjetë burra u përzgjodhën nga Federata e Futbollit të Kosovës (FFK) që, një ditë pas disfatës së dhimbshme ndaj Turqisë, në emër të kombëtares të pranojnë Medaljen Presidenciale të Meritave.
Në mesin e delegacionit të Federatës që shkoi në Presidencë të mërkurën në mëngjes për të pranuar Medaljen, ishin edhe kapiteni Vedat Muriqi e bashkëlojtari i tij, Valon Berisha – dy njerëz që janë bërë simbol i punës dhe i sakrificës për Kosovën.
Në anën tjetër ndodhej një njeri që simbolizon krejt të kundërtën e asaj që përfaqëson Muriqi me shokë.
Emri i tij është Bakir Burri.
Burri, me origjinë nga Peja, është nënkryetari i parë i Federatës së Futbollit të Kosovës, dora e djathtë e Agim Ademit dhe një njeri tek i cili i pari i FFK-së mbështetet tash e tetë vjet, prej që u zgjodh për herë të parë në krye të FFK-së.
Ndërsa kombëtarja po përgatitej për dy prej ndeshjeve më të rëndësishme në historinë e saj, Burri në prapaskenë po ballafaqohej me telashe personale.
Nuk kanë kaluar as gjatë javë prej se ai ishte cak i një aksioni masiv të autoriteteve që zbuloi një skemë të madhe të manipulimit me kontrabandë dhe cilësi të arit.
Rreth 25 kilogramë ari, me vlerë afër tre milionë euro, u kapën në argjendarinë e familjes së Burrit në Pejë.
Autoritetet zbuluan se kilogramët e arit po mbaheshin të fshehta në bunkerë brenda biznesit të familjes Burri.
Sipas ligjeve që rregullojnë tregtinë e produkteve të arit, çdo produkt i këtij lloji që hidhet në treg duhet të jetë i vulosur me dy vula: njëra që verifikon produktin dhe tjetra që tregon se ai është i ekzaminuar- se i dihet vlera dhe sasia.
Këtë as nuk i kishte shkuar në mendje ta bënte biznesi i nënkryetarit të FFK-së.
