Në një paraqitje në emisionin Debat Plus, Basha ka theksuar se vullneti i partisë në pushtet ka qenë që në krye të shtetit të vendoset një figurë konsensuale, e cila do të mund të siguronte mbështetje të gjerë politike dhe institucionale.
Sipas tij, emri i Murat Jasharit është propozuar pikërisht për këtë arsye, megjithatë ai ka shprehur mospajtim me refuzimin që Jashari i ka bërë kësaj ideje.
“Vullneti ynë ka qenë me pasë një figurë konsensuale me tejkalu këtë krizë. Kjo nuk ka ndodhë për shkak se z. Murat Jashari ka thënë se unë nuk i hyj kësaj rruge përveçse në rrethana tjera, për çka nuk pajtohem, sepse Kosova tash është në disa rrethana ku duhet me qenë Murat Jashari president”, ka deklaruar Basha.
Ai ka lënë të kuptohet se situata politike në vend kërkon një figurë që mund të bashkojë spektrin politik dhe të krijojë stabilitet institucional, duke theksuar se Jashari do të ishte një zgjedhje e duhur në këtë moment.
Deklarata e Bashës shihet si sinjal se Lëvizja Vetëvendosje vazhdon të insistojë në emrin e Murat Jasharit si kandidat të mundshëm për president, pavarësisht hezitimit të shprehur më herët nga vetë ai.
Çështja e presidentit ka qenë një nga temat më të diskutuara në skenën politike, veçanërisht në kontekstin e zhvillimeve të fundit institucionale dhe debateve rreth stabilitetit politik në vend.
