Një tjetër vlerësim i rëndësishëm ndërkombëtar ka ardhur për Presidenten e Kosovës, Vjosa Osmani, e cila është nderuar nga Asambleja Parlamentare e NATO-s si laureate e çmimit “Gratë për Paqe dhe Siguri 2025”, duke e vendosur atë në mesin e figurave që promovojnë paqen, sigurinë dhe lidershipin e grave në nivel global.
Në kuadër të shënimit të Dita Ndërkombëtare e Gruas, kjo aleancë e rëndësishme ndërkombëtare e ka zgjedhur presidenten e Kosovës që të përcjellë një mesazh për gratë dhe vajzat në mbarë botën, duke e nderuar për rolin dhe kontributin e saj në fuqizimin e grave në politikë dhe në proceset e vendimmarrjes.
Në publikimin e bërë nga Asambleja Parlamentare e NATO-s theksohet se përmes këtij mesazhi synohet të theksohet rëndësia e lidershipit të grave në ndërtimin e shoqërive më paqësore dhe më rezistente. Zgjedhja e Vjosa Osmani për këtë rol konsiderohet një vlerësim i drejtpërdrejtë për angazhimin dhe kontributin e saj në promovimin e vlerave demokratike dhe të sigurisë ndërkombëtare.
Në mesazhin e saj, presidentja Osmani theksoi se gratë kanë një rol të pazëvendësueshëm në ndërtimin e paqes dhe në forcimin e stabilitetit të shoqërive. Ajo nënvizoi se kur gratë janë pjesë aktive e lidershipit politik dhe institucional, vendet bëhen më të forta dhe më të qëndrueshme përballë sfidave globale.
Ky vlerësim nga një strukturë e rëndësishme e lidhur me NATO shihet nga shumë njohës të politikës ndërkombëtare si një sinjal mbështetjeje për rolin dhe angazhimin e presidentes së Kosovës në skenën ndërkombëtare. Në të njëjtën kohë, ai shërben edhe si një mesazh inkurajues për gratë dhe vajzat që të marrin rol më aktiv në jetën politike, diplomatike dhe shoqërore.
Me këtë nderim, Vjosa Osmani rikonfirmohet si një nga figurat politike nga rajoni që po merr vëmendje dhe vlerësim në arenën ndërkombëtare, veçanërisht në promovimin e rolit të grave në paqe, siguri dhe vendimmarrje.
