Postimet e fundit të presidentes së Kosovës, Vjosa Osmani, në rrjetet sociale kanë shënuar një rënie të dukshme të reagimeve nga publiku, vetëm pak ditë pas përplasjes së saj politike me kryeministrin Albin Kurti, raporton Gazeta Minuti.
Ndërsa një nga postimet e mëhershme të Osmanit, ku ajo kishte njoftuar se ka proceduar në Kuvend amendamentet kushtetuese që presidenti i vendit të zgjidhet drejtpërdrejt nga populli, kishte marrë mbi 26 mijë pëlqime, dy postimet e fundit kanë pasur reagim shumë më të ulët.
Në postimin më të fundit, ku presidentja njoftoi se do të zhvillojë një intervistë në një televizion në Shqipëri, numri i pëlqimeve ka rënë në rreth 860 reagime, duke shënuar një rënie të konsiderueshme krahasuar me postimet e mëparshme.
Kjo rënie e reagimeve në rrjetet sociale vjen në një kohë kur raportet politike mes presidentes Osmani dhe kryeministrit Kurti janë tensionuar, pas deklaratave dhe qëndrimeve të ndryshme lidhur me zhvillimet e fundit politike në vend.
Përplasja mes dy figurave kryesore të institucioneve të Kosovës ka nxitur reagime të shumta në opinionin publik dhe në rrjetet sociale, ku qytetarët kanë shprehur qëndrime të ndryshme për zhvillimet e fundit politike.
Megjithatë, mbetet e paqartë nëse rënia e reagimeve në postimet e fundit lidhet drejtpërdrejt me situatën politike, apo me faktorë të tjerë që ndikojnë në angazhimin e publikut në rrjetet sociale.
