Sipas burimeve të Gazeta Minuti, presidentja e Kosovës Vjosa Osmani tashmë ka marrë një vendim politik për të themeluar një parti të re politike, e cila pritet të hyjë në skenën politike në prag të zhvillimeve të reja dhe mundësisë për zgjedhje të parakohshme në vend.
Vendim politik për krijimin e një subjekti të ri
Burime të mirëinformuara brenda zhvillimeve politike i kanë thënë Gazeta Minuti se vendimi për krijimin e partisë së re është marrë tashmë në nivel politik dhe se janë duke u zhvilluar diskutimet e para për strukturimin e subjektit dhe përfshirjen e figurave të ndryshme nga skena politike dhe publike.
Sipas këtyre burimeve, në bërthamën fillestare të kësaj partie pritet të jenë vetë presidentja Vjosa Osmani, ish-deputetja Donika Kadaj-Bujupi dhe ish-ministrja Meliza Haradinaj-Stublla, të cilat konsiderohen si tre figurat e para që po punojnë në organizimin e këtij projekti të ri politik.
Burimet thonë se këto tri figura kanë zhvilluar tashmë takime dhe konsultime për të diskutuar hapat e mëtejshëm dhe mënyrën se si do të prezantohet partia e re në skenën politike.
Përfshirje e figurave të reja dhe të njohura
Sipas informacioneve që ka siguruar Gazeta Minuti, partia e re nuk pritet të përbëhet vetëm nga këto tre figura, por synon të përfshijë një spektër më të gjerë personalitetesh nga politika dhe jeta publike.
Burimet bëjnë të ditur se në këtë projekt politik pritet të përfshihen:
-
ish-deputetë të Kuvendit të Kosovës
-
ish-ministra nga qeveri të mëhershme
-
analistë politikë dhe figura publike
-
deputetë aktualë nga iniciativa Guxo
-
si dhe personalitete të tjera nga shoqëria civile dhe jeta publike
Qëllimi, sipas burimeve, është krijimi i një subjekti që do të prezantohet si një alternativë e re politike në vend.
Organizimi dhe prezantimi publik
Sipas burimeve të Gazeta Minuti, aktualisht janë duke u zhvilluar diskutime për strukturën organizative të partisë, programin politik dhe mënyrën e prezantimit publik të saj.
Po ashtu, thuhet se janë duke u bërë përpjekje për të krijuar një ekip më të gjerë themelues, në mënyrë që projekti të ketë një bazë më të gjerë politike dhe profesionale.
Në këtë fazë, sipas burimeve, po zhvillohen kontakte me figura të ndryshme nga skena politike që kanë qenë pjesë e institucioneve në të kaluarën, por edhe me emra të rinj që nuk kanë qenë të përfshirë drejtpërdrejt në politikë.
Mund të ndikojë në konfigurimin politik
Nëse ky projekt politik materializohet, analistët vlerësojnë se hyrja e një partie të re të udhëhequr nga Vjosa Osmanimund të ndikojë ndjeshëm në konfigurimin politik në vend, sidomos nëse në të përfshihen figura të njohura nga parti të ndryshme dhe nga iniciativa Guxo.
Megjithatë, deri më tani nuk ka një konfirmim zyrtar publik për këtë projekt politik, ndërsa pritet që në ditët ose javët në vijim të ketë zhvillime të reja dhe ndoshta edhe prezantimin formal të kësaj partie.
Gazeta Minuti do të vazhdojë të raportojë për çdo zhvillim të ri lidhur me këtë iniciativë politike që pritet të ndryshojë skenën politike në vend.
