Televizioni Kanal10 ka raportuar se Presidentja e Kosovës, Vjosa Osmani, është ndarë politikisht nga partia Guxo, subjektin që ajo e kishte themeluar para se të zgjidhej në krye të shtetit.
Sipas raportimit të Kanal10, marrëdhëniet mes Osmanit dhe drejtuesve aktualë të Guxo-s janë ftohur dukshëm muajve të fundit, për shkak të dallimeve në qëndrime politike dhe orientimin e partisë në kuadër të koalicionit qeverisës. Burimet e këtij televizioni bëjnë të ditur se Osmani tashmë nuk ka rol aktiv në vendimmarrjen e partisë që ajo vetë e kishte krijuar.
Në raportim thuhet se ndarja nuk është bërë ende publike përmes një deklarate zyrtare nga Presidentja apo nga drejtuesit e Guxo-s, por se zhvillimet e fundit politike tregojnë për një distancim të qartë mes palëve.
Partia Guxo ishte formuar nga Vjosa Osmani pas largimit të saj nga LDK-ja dhe më pas u bë pjesë e koalicionit me Lëvizjen Vetëvendosje, duke luajtur rol të rëndësishëm në zgjedhjen e saj Presidente të Republikës së Kosovës.
Deri në momentin e publikimit të këtij lajmi, nuk ka pasur reagim zyrtar as nga Presidenca dhe as nga drejtuesit e Guxo-s lidhur me raportimin e Kanal10.
Zhvillimet e reja pritet të kenë ndikim në skenën politike në vend, sidomos në prag të diskutimeve për zgjedhjet e ardhshme dhe për raportet brenda koalicionit qeverisës.
