Opinionisti Agim Vuniqi ka shkruar në Facebook se diplomati amerikan David Phillips ka bërë deklarata të forta lidhur me ish-presidentin Hashim Thaçi dhe idenë e shkëmbimit të territoreve ndërmjet Kosovës dhe Serbisë.
Vuniqi thekson se Phillips ka deklaruar për BIRN se në vjeshtën e vitit 2018, Hashim Thaçi i kishte kërkuar atij të përgatiste një studim që do ta përkrahte idenë e shkëmbimit të territoreve ndërmjet Kosovës dhe Serbisë. Sipas Agim Vuniqit, kjo kërkesë dëshmon për përpjekjet e vazhdueshme të ish-presidentit për të siguruar mbështetje ndërkombëtare për një projekt të kontestuar gjerësisht në Kosovë.
Duke iu referuar shkrimit të Vuniqit, David Phillips – drejtor i Programit për Ndërtimin e Paqes dhe të Drejtave në Institutin e Universitetit Columbia – kujton se kishte një kontratë me Ministrinë e Punëve të Jashtme të Kosovës, të nënshkruar më 26 shkurt 2018. Agim Vuniqi nënvizon se në këtë kontratë parashihej ofrimi i këshillave për çështje që lidhen me Kosovën, rajonin dhe dialogun me Serbinë.
Në postimin e tij, Vuniqi veçon deklaratën e Phillips se Thaçi i kishte kërkuar edhe përgatitjen e një punimi që do ta shpallte Gjykatën Speciale si jolegjitime. Sipas Vuniqit, refuzimi i kësaj kërkese nga ana e Phillips tregon integritet profesional dhe qëndrim të qartë kundër instrumentalizimit të akademikëve për qëllime politike.
Postimi i plotë:
Diplomati amerikan: Thaçi më tha, kush të ka paguar që të kundërshtosh propozimin tim rreth shkëmbimit të territoreve?
Akademiku amerikan David Phillips ka deklaruar për BIRN që Presidenti Hashim Thaçi i kishte kërkuar atij që të përgatiste një studim që do ta përkrahte shkëmbimin e territoreve në vjeshtën e vitit 2018.
Phillips, që është drejtor i Programit për Ndërtim të Paqes dhe të Drejtave në Institutin e Universitetit Kolumbia për Studime të të Drejtave të Njeriut dhe që ka shkruar rreth Kosovës që nga viti 1989, kishte nënshkruar një kontratë me Ministrinë e Punëve të Jashtme të Kosovës – MPJ, më 26 shkurt 2018.
Në kontratën e tij thuhet që ai duhet të ofrojë “këshilla sipas kërkesave të Kryeministrit dhe Ministrit të Punëve të Jashtme […] për çështje që kanë të bëjnë me Kosovën dhe regjionin, duke përfshirë këshillat që lidhen me Dialogun me Serbinë”.
Phillips ka folur rreth dy kërkesave që Thaçi i kishte për të gjatë kohës që po punonte për MPJ-në.
“Gjatë vjeshtës së vitit 2018, Hashimi [Thaçi] më kërkoi që të shkruaja një punim ku do të argumentoja që Gjykata Speciale është jolegjitime”, deklaroi ai. “Unë e refuzova këtë kërkesë”.
Phillips tutje tha që “ai po ashtu më kërkoi që të përgatisja një punim në përkrahje të shkëmbimit të territoreve”.
“Unë nuk besoj që ndarja është në interes të Kosovës dhe kurrë nuk do të bëja diçka që nuk është në interes të Kosovës, prandaj e refuzova”.
Phillips përshkroi në detaje një udhëtim që ai dhe vajzat e tij adoleshente kishin pasur në Kosovë në mars të vitit 2019, kur familja po bënin përpjekje që të rindërtonin Bibliotekën e Mitrovicës përmes fondit të familjes Phillips. Phillips pretendon që në këtë udhëtim, Thaçi e kishte akuzuar atë se ishte shitur.
Philips ka deklaruar që “gjatë udhëtimit, i dërgova vajzat e mia binjake që ishin 15 vjeçare që ta takonin Presidentin Thaçi”. “Në sy të fëmijëve të mi, ai më akuzoi që isha i korruptuar. Ai më pyeti ‘kush të ka paguar që të kundërshtosh propozimin tim rreth shkëmbimit të territoreve? E di që jeni shitur, prej nga kanë ardhur ato para?’
“Asnjë shumë parash nuk do të më bindte që të tradhtoj ndërgjegjen time,” ka deklaruar Phillips.
