Pas ceremonisë patetike të Universitetit të Prishtinës ku u nderuan Albin Kurti dhe Vjosa Osmani me çmimin ‘Alumni Nderi’ për kushedi se çfarë justifikimi normal, edhe aktivisti Rron Gjinovci kritikoi ashpër universitetin publik, shkruan Periskopi.
Gjinovci tha se UP-ja dështoi në rolin e saj, duke iu vardisur pushtetit e duke nderuar njerëz që s’kanë asnjë arritje që lidhet me studimet në këtë universitet.
“A nuk pat Kosova asnji shkencëtar të suksesshëm që është alumni i UP-së (pra që ka studiu dikur e tash është i njohun në fushën e vet të studimeve), po veç Vjosa e Albini që kurrfarë arritje jetësore nuk e kanë të lidhun me studimet e tyne në UP? Dobët UP-ja, tepër dobët”, shkroi aktivisti i njohur për qëndrime pro-pushtetit.
Ai tha se ky institucion i arsimit të lartë nuk bën t’i gjunjëzohet pushtetit, por ta emancipojë shoqërinë.
“UP e ka pasë rolin me i pri shoqnisë kosovare në emancipim e revoltë, e jo me iu vardisë pushtetarëve. Prandaj nuk duhet rektorin me caktu kryeministri, se qe çka ndodh, i mshohët shuplakë misionit të universitetit ma të randësishëm në vend”, tha në fund Gjinovci.
Universiteti i Prishtinës, përmes rektorit, e arsyetoi vendimin e sotëm për kinse rolin e dyshes Kurti-Osmani në lirinë e Kosovës dhe në përfaqësimin e shtetit.
