Prokurori që po e ekzaminonte James Rubin-in si dëshmitar të mbrojtjes së Hashim Thaçit në Gjykatën Speciale, ia riktheu një intervistë të dhënë vitin e kaluar në “N1”, ku ai e kishte cilësuar si “të turpshme” punën e Prokurorisë Speciale në përpjekjen për të barazuar krimet e luftës të Sllobodan Millosheviqit me ato të luftës çlirimtare të shqiptarëve të Kosovës.
Pasi e dëgjoi deri në fund deklarimin e vet të rikthyer nga Prokuroria, Rubin buzëqeshi.
“Po e përdor si shembull përndjekjen e ish-Presidentit të Kosovës, Hashim Thaçit, që është për të ardhur turp. Qeveria e Kosovës krijoi tribunalin e vet nën urdhërin e Perëndimit dhe pastaj ai u përndoq nën një teori tërësisht absurde se ai gjoja paska kontrolluar gjithçka që qartazi nuk është e vërtetë. Dhe, për më keq, po e mbajnë në burg për shumë vite sepse nuk po dinë qysh t’ia bëjnë për ta mbajtur këtë gjyq që të vazhdojë tutje. Shpresoj që të jem dëshmitar në mbrojtje të Hashim Thaçit ku besoj se është një çështje e shtrembërimit të sistemit të drejtësisë: ku është një përpjekje që po bëhet nga disa liderë politikë që po provojnë të tregojnë këtë tregimit e ‘dypalshmërisë’ që edhe serbët edhe kosovarët paskan kryer krime lufte. Jo. Ushtria e Serbisë kreu 95 përqind të vrasjeve masive, jo të gjitha vrasjet, po i tërë problemi në Kosovë, dhe të provosh të barazosh shqiptarët e Kosovës me atë çka lideri i Serbisë, Millosheviq bëri është e turpshme. Dhe fakti që as s’e lënë Hashim Thaçin për t’u liruar me kusht përderisa ai i priste ata që të ta mbledhin atë akt…”, kishte deklaruar Rubin.
Prokurori: Ju jeni që po i thoni këto fjalë?
Rubin: Shumë herët në mëngjes, po.
