Vetitë e dobishme të boronicave dhe sasia e konsumit që mund të jetë e dobishme për shëndetin janë shqyrtuar nga një sërë studimesh të botuara në The Journals of Gerontology.
“Që nga vitet 1990, kërkimet mbi përfitimet shëndetësore të boronicave janë rritur ndjeshëm. Studimet kanë treguar se këto fruta kanë aktivitetin më të lartë antioksidues krahasuar me shumë fruta të tjera. Përveç kësaj, janë identifikuar shumë mekanizma se si boronicat i sjellin dobi shëndetit, siç janë vetitë e tyre anti-inflamatore”, shkruan Dr. Donald K. Ingram.
Një studim zbuloi se ngrënia e 200 gramëve boronica në ditë mund të përmirësojë funksionin e enëve të gjakut dhe të ulë presionin sistolik të gjakut. Studiuesit ia atribuojnë këtë efekt antocianinave, të cilat janë fitokimikate që u japin boronicave ngjyrën e tyre të errët.
Studime të tjera kanë treguar përfitime njohëse nga konsumimi i boronicave. Një studim zbuloi se përmbajtja e lartë e polifenoleve përmirësoi performancën e kujtesës në një grup të rriturish të moshuar. Një studim tjetër shqyrtoi përfitimet e suplementeve të boronicave në kujtesë si tek fëmijët ashtu edhe tek të rriturit e moshuar me dëmtim të lehtë njohës.
