Në një lajm që ka zgjuar interes dhe entuziazëm të madh te publiku shqiptar, dy prej emrave më të mëdhenj të muzikës popullore dhe zbavitëse shqiptare, Shyhrete Behluli dhe Gili, kanë bërë të ditur se kanë finalizuar projektin e tyre të parë të përbashkët muzikor.
Kënga do të publikohet zyrtarisht nesër dhe pritet të shënojë një moment historik në skenën muzikore shqiptare.
Lajmin e ka konfirmuar vetë këngëtarja e mirënjohur Shyhrete Behluli përmes një postimi në profilin e saj zyrtar në rrjetin social Instagram, ku ndanë emocionet dhe pritshmëritë e saj për këtë projekt unik. Ajo shkruan:
“Nesër premierë projekti jonë i parë bashkë me Gilin”, duke lënë të kuptohet se kënga është gati dhe pritet të publikohet me një lansim të organizuar.
Ky bashkëpunim shënon një ngjarje të veçantë në muzikën shqiptare, pasi që të dyja artistet gëzojnë një status të lartë artistik dhe kanë kontribuar ndër vite në ndërtimin dhe ruajtjen e vlerave të muzikës shqiptare, secila me stilin dhe identitetin e saj.
Shyhrete Behluli, me një karrierë që përfshin mbi katër dekada, është një ndër figurat më të dashura të muzikës popullore shqipe. E njohur për zërin e saj të veçantë dhe për interpretimin e këngëve që prekin thellë shpirtin e publikut, ajo ka qenë gjithmonë një simbol i forcës dhe i krenarisë kombëtare, sidomos në momentet e vështira të historisë së Kosovës.
Në anën tjetër, Gili, emri artistik i Mimoza Mustafa, është një prej emrave më të spikatur të muzikës zbavitëse në Kosovë dhe më gjerë. Ajo është e njohur për energjinë në skenë, për meloditë moderne të ndërthurura me motive shqiptare dhe për hitet që kanë bërë jehonë ndër vite. Gili është e admiruar si nga brezat e rinj, ashtu edhe nga ata që e kanë ndjekur që nga fillimet e saj në vitet ‘80.
