Avokati i njohur Kosovar, Arianit Koci ka dhënë detaje të reja rreth ngjarjeve të sotme në Kongresin e UEFA-së i cili u mbajt në Beograd, ku u largua flamuri i Republikës së Kosovës.
Koci përmes një statusi në Facebook ka thënë se ka biseduar me Presidentin e Federatës së Futbollit të Kosovës, i cili i ka konfirmuar se flamuri i Kosovës nuk është hequr gjatë pjesës zyrtare të punimeve, por pas përfundimit të takimit, kur gjithçka kishte marrë fund, shkruan IndeksOnline.
Sipas tij, kjo është një farsë e Serbisë është sajuar për konsum të brendshëm politik.
Postimi i plotë:
Flamuri i Kosovës nuk është hequr gjatë pjesës zyrtare në Beograd
Kjo është e vërteta.
Posa fola me Agim Ademin, kryetarin e Federatës së Futbollit të Kosovës. Ai konfirmoi se gjatë gjithë pjesës zyrtare të punimeve në Beograd, flamuri i Republikës së Kosovës ka qenë i vendosur përkrah flamujve të të gjitha shteteve anëtare të UEFA-s.
Është hequr vetëm pas përfundimit të takimit – kur gjithçka kishte marrë fund.
E gjithë kjo farsë e Serbisë është sajuar për konsum të brendshëm politik. Tentimi për ta paraqitur pjesëmarrjen e Kosovës si të parëndësishme apo të diskutueshme është mashtrim i zakonshëm politik, jo realitet sportiv.
Kosova është anëtare e barabartë në UEFA dhe FIFA – me të gjitha të drejtat dhe simbolet shtetërore.
Faktet nuk i ndal askush. Flamuri ynë ka qenë aty – me dinjitet dhe në mënyrë të ligjshme.
