Nënkryetari i Lidhjes Demokratike të Kosovës, Lutfi Haziri tha se të martën se LDK-ja nuk do t’i “bashkëngjitet një ftese eventuale” të Vetëvendosjes për koalicion.
Të martën, në një intervistë për Politiko në Kanal 10, Haziri tha se është paragjykuese të thuhet se LDK nuk do të ulet të bisedojë me LVV-në nëse nuk ka ende ftesë.
“Me terma të mi është që ne nuk i bashkëngjitemi një ftese eventuale për koalicion me Vetëvendosjen. Kjo është paragjykuese me thënë se unë nuk shkoj, pa të thirrë ai hiç. Më 9 shkurt ai [Kurti, v.j] ka thënë se nuk bëj koalicion me këto parti”, tha ai.
Sipas Hazirit, LDK-ja ka qëndrim parimor për koalicion me LVV-në.
“Deri sonte, [Vetëvendosje] nuk e ka ftuar kërkend me e bë qeverinë. Nëse na ftojmë, ne e kemi thënë se ne nuk tregojmë gatishmëri të ulemi e të ndërtojmë koalicion me Vetëvendosjen sepse ky nuk është akt. Për të bërë partneritet koalicion me dikënd, ky është proces politik”, tha Haziri.
“Tani në raport me të parin, ne thamë hiç. Kjo është parimore. LDK-ja nuk ka kushte, as kërkesë, për një koalicion me Vetëvendosjen, sepse ne kemi një histori bashkëpunimi me LVV-në për dallim me të tjerët”, përfundoi ai.
