Ministri i mbrojtjes i Hungarisë, Kristof Szalay-Bobrovniczky është në takim me Vuçiqin ku do të nënshkruhet një dokument në fushën e mbrojtjes.
Takimi ka filluar në orën 10:00 në Pallatin e Serbisë, ku janë të pranishëm edhe ministri serb i mbrojtjes në dorëheqje, Bratillsav Gashiq dhe shefi i Shtabit të Përgjithshëm të ushtrisë serbe, Millan Mojsilloviq.
Sipas kumtesës së shërbimit të Vuçiqit për media, pas takimit të dy zyrtarët do të marrin pjesë në nënshkrimin e një dokumenti në fushën e mbrojtjes, e më pas do të deklarohen për media.
Nënshkrimi i dokumentit ndërmjet Hungarisë dhe Serbisë kohë më parë është paralajmëruar nga Vuçiqi pas një bisede me kryeministrin hungarez Viktor Orban, kur ka thënë se “së shpejti do të nënshkruhen gjëra të rëndësishme dhe të mëdha”.
Në atë bisedë telefonike, Vuçiq dhe Orban janë pajtuar për përmirësimin e përshpejtuar të marrëdhënieve dypalëshe në të gjitha sferat, përfshirë ato ushtarake dhe ato të mbrojtjes.
Nënshkrimi i këtij dokumenti është praktikisht një përgjigje ndaj marrëveshjes së nënshkruar në Tiranë nga Shqipëria, Kosova dhe Kroacia.
