Brendi i njohur i modës “Bukur”, i themeluar nga stilistja e suksesshme Blerina Kllokoqi-Rugova, është përzgjedhur për të dizajnuar uniformat e reja të Ushtrisë së Republikës së Kosovës.
Ky është një hap i rëndësishëm për industrinë vendase të modës, shkruan Indeksonline.
Blerina Kllokoqi-Rugova, e njohur për dizajnet e saj elegante dhe inovative, ka shprehur emocionet e saj për këtë arritje.
“Me krenari ju njoftojmë se brendi “Bukur” është përzgjedhur që t’i dizajnojë uniformat e Ushtrisë së Republikës së Kosovës që për ne si brend është një nder shumë i madh dhe një arritje historike” tha ajo.
Ky bashkëpunim shënon një moment historik për industrinë e modës në Kosovë, duke dëshmuar se talenti vendor mund të kontribuojë në sektorë të ndryshëm, përfshirë atë ushtarak.
Mbetet të shihet sesi ky projekt do të ndikojë në imazhin dhe përformancën e Ushtrisë së Kosovës, por një gjë është e sigurt – dizajni i tyre do të jetë një kombinim i stilit dhe funksionalitetit.
