Kryetarja e Gjykatës Kushtetuese, Gresa Caka-Nimani, i është përgjigjur deklaratës që kryeministri Kurti kishte dhënë për televizionin publik, ku ky i fundit e kritikonte Gjykatën Kushtetuese duke thënë se nuk është apolitike, dhe duke i ftuar gjykatësit e kësaj gjykate që të garojë në zgjedhjet e ardhshme.
Caka-Nimani tha se është e rëndësishme të sqarohet se Gjykata Kushtetuese nuk ka kompetenca vetanake për vlerësimin e kushtetutshmërisë së ligjeve.
”Gjykata Kushtetuese vihet në lëvizje nga palët e autorizuara, të përcaktuara me Kushtetutë, Kushtetutë të cilën e ka miratuar Kuvendi i Republikës së Kosovës, në kontekst të ligjeve. Këto janë ligje që janë kontestuar në Gjykatë Kushtetuese nga palët e autorizuara, kur një kërkesë vije në Gjykatën Kushtetuese sipas përcaktimeve kushtetuese, sepse ka kritere të përcaktuara në ligj, sigurisht që Gjykata e ka për detyrë kushtetuese që të trajtojë çështjen që ka para saj dhe të nxjerrë verdiktin e saj”, tha Caka-Nimani.
Caka-Nimani tha se ftesa e kryeministrit Kurti që Gjykata Kushtetuese të garojë në zgjedhje është kontestim i legjitimitetit demokratik të kësaj gjykate dhe të gjykatave të tjera.
”Sa i përket thirrjes për të garuar në zgjedhje, edhe pse jo me një formulim të tillë kjo çështje nuk është detyrimisht e re, dhe ngërthen një shkollë mendimi e cila konteston legjitimitetin demokratik të gjykatave për të nxjerrë vendime, përfshirë anuluar akte të Kuvendit, të cilat janë miratuar nga përfaqësuesit e popullit”.
“Një thirrje e tillë s’mund të nënkuptohet ndryshe përpos si kontestim i legjitimitetit demokratik të Gjykatës Kushtetuese dhe gjykatave të tjera dhe e them me siguri, sepse kjo është çështje trajtimi në të drejtën kushtetuese nga shkolla të caktuara mendimi që argumentojnë që gjykatat nuk kanë legjitimitetin e duhur për të anuluar vendime të miratuara nga përfaqësuesit e popullit”, tha Caka-Nimani.
