Publicisti serb, Nenad Kulaçin e ka shkruar një opinion në Al-Jazeera në gjuhën serbe, ku ka argumentuar se si presidenti serb, Aleksandar Vuçiq “është pajtuar me humbjen e Kosovës”.
“Nëntëdhjetë minuta pas nisjes së avionit presidencial francez francez nga pista e aeroportit Nikola Tesla në Beograd, ku po transportohej presidenti Emmanuel Macron, forcat speciale të Kosovës bastisën ato pak institucione serbe që kishin mbetur në veri të Kosovës”. Kështu e nis shkrimin e tij Kulaçin, duke përshkruar se si Vuçiqi u nis po atë ditë për në Pragë, kryeministri serb, Millosh Vuçeviq ishte mbledhur me disa persona për të kënduar këngë nacionaliste dhe se si kryeparlamentarja serbe, Ana Bërnabiq e vazhdoi “turin e saj në programet e mëngjesit”.
“Të gjithë, në krye me Vuçiqin, sikur ishin pajtuar me faktin se Kosova ishte e humbur. E gjithë kjo ta kujton shumë riintegrimin paqësor të Sllavonisë dhe Baranjës në Kroaci në fillim të vitit 1998”, shkruan ai.
Kulaçin shkruan se si Vuçiqi “i është dorëzuar Prishtinës. Ai thotë se “me të drejtë shtrohet pyetja nëse Serbia ka ende çfarë t’i dorëzojë Kosovës”.
“Që prej ardhjes së Vuçiqit në pushtet, serbët e kanë humbur në mënyrë të njëpasnjëshme juridiksionin pjesë-pjesë dhe ia kanë dorëzuar autoriteteve në Kosovë. Së pari, me Marrëveshjen e Brukselit të vitit 2013, Beogradi ia dorëzoi Prishtinës vetëqeverisjen lokale, e cila që atëherë është zgjedhur në përputhje me ligjet e Kosovës. Në atë pako është pranuar policia e Kosovës dhe një numër i madh i serbëve e kanë pranuar atë uniformë të re. E gjithë pjesa veriore e Kosovës, duke përfshirë enklavat me shumicë serbe, hynë nën sistemin gjyqësor të Kosovës. Gjithçka që ish-presidenti i Serbisë Boris Tadiq nuk ka dashur ta pranojë, Vuçiq e ka pranuar me nënshkrimin e kryeministrit të atëhershëm Ivica Daçiq dhe mbi të gjitha – tërheqjen e strukturave paralele serbe nga Kosova”, shkruan ai.
Gazetari serb thotë se “Vuçiq arriti t’i portretizojë të gjitha këto si fitore të politikës së tij”.
