Në komunat në veri të republikës është kthyer qetësia dhe deri diku edhe ligjshmëria. Këtë e deklaron nënkryetarja e Komunës së Leposaviqit, Marina Bogojeviq, sipas së cilës, ndërhyrjet e strukturave paralele deri tash kanë shkaktuar konfuzion të madh te qytetarët. Në intervistë për RTK-në, ajo thotë se sa i përket Asociacionit, për të dhe qytetarët serbë që jetojnë në këtë komunë, mundësia e vetme e zgjidhjes është koordinimi direkt me Prishtinën.
Nënkryetarja e Komunës së Leposaviqit, Marina Bogojeviq, ka thënë se po punohet në realizimin e projekteve për komunën dhe fshatrat përreth, por ajo e thekson si problematikë integrimin e plotë të serbëve përderisa ata vazhdojnë të marrin paga e pensione nga Serbia.
Prezenca përmes institucioneve paralele serbe është e dëmshme, duke i ndarë njerëzit, disa në njërën anë të cilët në mënyrë enorme janë pasuruar dhe në anën tjetër përqindjen e njerëzve që kanë jetuar buzë ekzistencës. Po e shoh se tash me ardhjen e institucioneve të reja komunës, e kemi kuptuar që ka qenë një numër i njerëzve të cilët mezi kanë mbijetuar. Çdo përzierje e institucioneve paralele të autoriteteve serbe këtu, do të jetë e dëmshme për këtë popull”, ka deklaruar ajo.
E pyetur se a janë të gatshëm si qytetarë të veriut të kontribuojnë në një draft eventual të Asociacionit, ajo e sheh si të pamundur një gjë të tillë, për shkak të siç thotë ajo, mungesës së shtresës politike intelektuale në veri.
Nënkryetarja aktuale e Leposaviqit thotë se banorëve serbë u duhet vetëm kuadri legjislativ përmes Asociacionit. Ajo tutje thekson se ndërhyrjet e strukturave paralele deri tash kanë shkaktuar konfuzion të madh tek populli.
“Sa i përket Asociacionit, për mua dhe qytetarët serbë që jetojnë këtu, mundësia e vetme e zgjidhjes është koordinimi direkt me Prishtinën, zgjidhjet të bëhen nga Prishtina, sepse ne nuk shohim më mbrapa, dhe në dy kryetarë. E shohim vetëm gjendjen reale e cila është tash në terren. Gjendja jonë reale është që të merremi me veten përmes punësimit të rinisë, siç po e bëjmë përmes komunës, kemi konkurse të reja të hapura. Kështu që rinia në tërë territorin e veriut, nuk ka shkuar për shkak të politikës së Kosovës por për shkak të politikës së Serbisë”, ka thënë ajo.
Sipas nënkryetares së Leposaviqit për banorët e komunitetit serb në veri të Mitrovicës duhet vetëm një zgjidhje; punësim e jetë më e mirë në hapësirat në të cilat jetojnë.
