“Tragjedia që po ndodh në territoret e pushtuara palestineze i ka tejkaluar kufijtë e tolerancës së njerëzimit. Asgjë që po ndodh në Gaza nuk mund të shpjegohet në bazë të së drejtës për vetëmbrojtje”.
Me këtë frazë, Tayyip Erdogan shfrytëzoi rastin për të sulmuar Izraelin për situatën në Gaza gjatë Samitit të G20.
“Ndërsa lufta në Ukrainë vazhdon, ne tani po përjetojmë një krizë tjetër që nga 7 tetori. Tragjedia që po ndodh në territoret e pushtuara palestineze, veçanërisht në Gaza, tashmë ka tejkaluar kufijtë e tolerancës së njerëzimit.
Siç e dini, 2 ditë më parë, 20 Nëntori ishte Dita Ndërkombëtare për të Drejtat e Fëmijëve. Fatkeqësisht, gati 7 mijë fëmijë të pafajshëm palestinezë nuk jetuan për ta parë këtë ditë. Sepse administrata izraelite ua hoqi të drejtën më elementare 14 mijë civilëve, përfshirë këta fëmijë, të drejtën e jetës”, tha presidenti turk.
“Krimet e luftës dhe krimet kundër njerëzimit janë të dukshme. Ata që i kanë bërë duhet të mbajnë përgjegjësi përpara ndërgjegjes së njerëzimit dhe ligjit ndërkombëtar.
Me ngjarjet e fundit, të gjithë ne e kemi parë përsëri rëndësinë e krijimit të një shteti të pavarur palestinez që jeton në paqe përkrah Izraelit, me Jerusalemin Lindor si kryeqytet, bazuar në kufijtë e vitit 1967.
Ne jemi të gatshëm të marrim përgjegjësinë së bashku me vendet e tjera, duke përfshirë Turqinë dhe si garantues.
Ne do të vazhdojmë të dërgojmë ndihma humanitare dhe ju bëj thirrje që të ndërmerrni hapat e nevojshëm për të ofruar ndihmë humanitare dhe mjekësore për Gazën”, përfundoi ai.
