Kancelari i Gjermanisë, Olaf Scholz, ka bërë të ditur se vendi i tij këtë vit do ta miratojë reformën në ligjin për shtetësinë duke iu mundësuar emigrantëve shtetësinë e shumëfishtë.
Duke folur në një konferencë për media në Berlin, Scholz tha se qeveria e tij e koalicionit aktualisht po përgatit një projektligj që do të lehtësojë procesin e natyralizimit.
“Me reformën, kushdo që merr shtetësinë gjermane, do të mund ta mbajë shtetësinë e mëparshme”, tha kancelari gjerman, duke shtuar se aktualisht ky është rasti për shtetasit e vendeve anëtare të Bashkimit Evropian (BE) dhe disa vendeve të tjera.
Siç theksoi ai, kjo është një reformë e nevojshme dhe “tani po hyn në përfundim dhe kjo do të realizohet brenda këtij viti”.
Mbi 10 milionë njerëz nga popullsia prej 84-milionësh e Gjermanisë janë të huaj dhe shumë prej tyre nuk kanë shtetësi gjermane, edhe pse kanë jetuar prej kohësh në këtë vend.
Kancelari gjerman Scholz vazhdimisht ka deklaruar se përshpejtimi i procesit të natyralizimit do të rrisë integrimin dhe pjesëmarrjen sociale e politike të emigrantëve.
