Mirlind Daku është shprehur tejet i zhgënjyer me mos-ftesën nga Kombëtarja e Kosovës për ndeshjet e këtij muaji, në kuadër të kualifikimeve për Kampionatin Evropian “Euro 2024”.
Sulmuesi kosovar ka thënë se nuk është kontaktuar fare gjatë gjithë kësaj periudhe nga përzgjedhësi Alain Giresse ose dikush tjetër nga Kosova, shkruan Gazeta Express.
Daku, për të cilin u raportua se ka qenë i lidhur me një mundësi për të përfaqësuar Shqipërinë, tha se do të luante për “Kuqezinjtë” nëse do t’i jepet mundësia.
“Prej këtij momenti, prej kësaj faze që nuk e kom pasë ftesën e Kombëtares së Kosovës, mundem më thënë se kam për të filluar ta mendojë edhe këtë mundësi. Nëse më jepet mundësia, do ta përfaqësojë me gjithë zemër”, tha ai për “Dueli Sportiv”.
“Kur po vije puna me këtë formë kaq të mirë, me statistika kaq të mira, me minutazhën e duhur, nuk po vije ftesa, po është diçka shumë jo-korrekte ndaj meje”, shtoi 25-vjeçari.
Ai tha se nuk dëshiron që të tingëllojë që ia dëshiron të keqen Kosovës.
“Ndoshta po dukemi pak se ia kemi syrin e keq Kombëtares. Por, pavarësisht nëse jam unë apo jo, unë ia dua të mirën Kombëtares së Kosovës dhe Kombëtares së Shqipërisë. Unë jam rritur e zhvilluar këtu”, tha ish-sulmuesi i Hajvalisë, Llapit e Ballkanit.
Daku ironizoi me mos-ftesën e Kombëtares së Kosovës, duke i falënderuar për këtë veprim.
“Edhe për të ardhmen time kishte mundur të ndikonte ftesa e Kombëtares, për arsye se edhe klubet e interesuara të shohin me një sy tjetër. Ftesa nuk arriti. Dua t’i falënderoj shumë për këtë gjest ndaj meje. Për të ardhmen ka me pasë diçka shumë të jashtëzakonshme këtë merkato. Jemi duke shqyrtuar ofertat. Shpresoj se do t’i bëjë krenarë tërë popullin shqiptar”, u shpreh Daku.
Mirlind Daku shkëlqeu në sezonin e fundit me Muran, duke shënuar 22 gola në 37 paraqitje në të gjitha garat.
Ai me 20 gola në kampionatin slloven u rendit si golashënuesi i dytë më i mirë për sezonin 2022/23.
Përzgjedhësi i Kosovës, Alain Giresse, ditë më parë deklaroi se vendimi për mos-ftesën e Dakut ka të bëjë me arsye sportive.
“Për Dakun ka të bëjë me zgjidhje sportive. Po ashtu në repartin e sulmit ka shumë lojtarë dhe kjo është arsyeja pse nuk e kam ftuar, edhe pse po tregon paraqitje të mira”, ishte shprehur francezi në konferencën për media të premten. /Gazeta Express/
